Сүйінші! Маңғыстауда 4 мектептің түлегі түгелдей білім беру грантын иеленді

Маңғыстауда екі мемлекеттік, екі жекеменшік мектептің түлегі тұтастай білім беру грантын иеленді, - деп хабарлайды mangystaumedia.kz

Олардың ішінде Түпқараған ауданы Ақшұқыр мектеп-лицейінің 22 оқушысы мен Бейнеу ауданы Бейнеу гимназиясының 19 түлегі және Мұнайлы ауданындағы «GRANT» HIGH school-lyceum» мектеп-лицейі 9 оқушысы, «QazBilim» ұлттық лицейінің 13 түлегі бар.

Олардың басым көпшілігі техникалық жоғары оқу орындарын таңдап, болашақта мұғалім, инженер, IT және байланыс саласының мамандары атануды мақсат еткен.

Бейнеу гимназиясының «Алтын белгі» иегері Інжу Нұрбергенова сыныптың осындай жақсы нәтижесі түлектердің үздіксіз дайындығы мен мектеп ұжымының жемісті еңбегі дейді.

- ҰБТ-дан 120 ұпай жинадым. Информатика, математика пәндерін таңдадым. Қазақстан-Британ техникалық университетінің ақпараттық технологиялар мамандығына грантқа оқуға түстім. Мектеп түлектерінің тұтастай грантқа түсуі Маңғыстау облысының білім саласындағы үлкен жетістіктердің бірі деп санаймын. Мұндай нәтижеге түлектердің тынымсыз дайындығының, ата-аналардың және гимназия ұжымының жемісті еңбегінің арқасында жеттік деп ойлаймын. Сыныптастарымның грант иеленгеніне қуаныштымын, - деді Інжу Нұрбергенова.

Түлектерінің үмітті ақтағанына қуанған сынып жетекшісі Қалампыр Бекқалиева бұл мектептің ғана емес, бірлескен жұмыстың нәтижесі дейді.

- Түлектердің ЖОО-ның грантына 100% түсуі оқушылардың алға қойған мақсатына жетуге деген талпыныстарының нәтижесі. Оқушыларымыз бұған дейін де жетістіктерге жетіп жүрді. Оқушымыз Ақнұр Жалғасбаева Қанипа Бітібаева атындағы қазақ тілі мен әдебиетінен оқушылардың республикалық олимпиадасының 2-орын иегері, Нұрсауле Нұрым жалпы білім беретін пәндер бойынша 9-11 сынып оқушыларына арналған республикалық олимпиаданың республикалық кезеңінің қатысушысы. Оқушыларымыздың үздік нәтижесіне қуаныштымыз, сәт сапар тілейміз, - деді Бейнеу гимназиясының мұғалімі Қалампыр Бекқалиева.