Қазақстан Республикасы Парламенті Мәжілісінің депутаттары Еділ Жаңбыршин және Самат Мұсабаев Жетібай және Мұнайшы ауылының тұрғындарымен кездесті.
Жетібай ауылдық мәдениет үйінде өткен кездесуге жиналған 300-ге тарта тұрғынның ортаға қойған ортақ сауалы – жұмыссыздық мәселесі болды.
«Жұмыс болғанда да, 150-200 мың айлығы бар жұмыс емес, кәдімгідей мұнайшы болып, қомақты айлық жалақыға қол жеткізгіміз келеді. Бізді әлеуметтік мәселелер алаңдатпайды, ол аудан көлемінде де шешілетін дүние. Бізге керегі – тек қана жұмыс, мұнайшы болғымыз келеді. Ол үшін ауылдағы ұсақ-түйек еншілес компаниялар жабылып, жұмыскер тікелей «Маңғыстаумұнайгаздың» қарамағында болатындай жұмыс орны құрылса», - дейді кездесуге келген тұрғындар.
Сондай-ақ елордадан келген ел ағаларына «болашақта да жұмыссыздық мәселесі болмауы үшін жаңа зауыт, өндіріс салынса» деген тілектерін де жеткізді.
Жұмыссыздық мәселесі бойынша бұған дейін де бірнеше рет айтылып, аудан басшыларымен кездесу өткен болатын.Тиісті жұмыстар жасалып, жергілікті өндіріс орындарымен келіссөздер жүргізілгенімен мәселе түбегейлі шешілмей тұр. Ауылда жұмыссыздардың нақты санын анықтау үшін комиссия құрылып, тиісті жұмыстар жасалған.
Аудан басшысы тұрғындардың талабы бойынша жуық арада ауыл маңында орналасқан 13 мекеменің басшылығымен кездесу ұйымдастыратын болып келісті.
Тұрғындар жұмыссыздықпен қоса экология мәселесін де қозғады.
Мәжіліс депутаттары айтылған мәселелерді тиісті жеріне жеткізіп, жұмыстанатындарын, ұсыныстарының назардан тыс қалмайтынын айтты. Жұмыссыздық мәселесін шешу үшін арнайы комиссия құрып, мекемелердегі бос жұмыс орындарын анықтау керектігін тапсырды.
Жиынның соңы қоғамдық қабылдауға ұласты. Ауылға арнайы келген депутаттар аудан басшысымен бірге тұрғындарды жеке мәселесі бойынша қабылдады. Онда да сол жұмыс, тұрғын үй кезегі сияқты мәселелер қойды. Тіпті, бір перзентке зар болып жүрген ана сәби асырап алу мәселесінде кездесетін қиындықтарды айтып, көмек те сұрады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
