"Жырлаймын сені, Жаңаөзен"

Осындай атаумен қаланың 50 жылдық мерейтойына орай үш күнге созылатын мерекелік шараның шымылдығын республикалық ақындар мүшәйрасы ашты.

Жыр додасында 18 бен 40 жас аралығында еліміздің әр түкпірінен 43 ақыннан 86 өлең қабылданып, олардың ішінен 11 туынды іріктеліп алынып, жаңаөзендік жұртшылықтың назарына ұсынылды. Жазба ақындардың өнерін бағамдауға жергілікті ақындар мен қатар Қазақстан Жазушылар Одағының мүшесі, ақын, Гумилев атындағы Еуразия ұлттық университетінің оқытушысы, доцент Оңайгүл Тұржан мен айтыскер ақын, халықаралық, республикалық додалардың жүлдегері, "Отпан Тау" тарихи - мәдени кешенінің директоры Нұрлан Мұсаевтар келді.

Арысы Астана, Түркістан, Семей, Шымкент, Орал, Атырау, берісі Ақтау мен өзіміздің Жаңаөзеннен қатысқан сөз шеберлерінің жыр сайысында бас жүлдені бейнеулік Асылбек Жаңбырбай жеңіп алып, 500 мың теңге ақшалай сыйлыққа ие болды. І орынды семейлік Мерей Қарт қанжығасына байласа, ІІ орын жаңаөзендік Жасұлан Майлыбайға бұйырды. Ал ІІІ орынды Алмас Алтай мен Шерхан Талап өзара бөлісті. Барлық қатысушылар арнайы жүлделермен және қаржылай сыйлықтармен марапатталды.

Жаңаөзен қаласының әкімі Әділбек Дауылбаев қазылар алқасының төрайымы Оңайгүл Тұржанға алғысын білдіріп, бешпент кигізді.

Айжан НАСЫРОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.