Журналист оқушылар арасында

Жуырда Жаңаөзен қаламыздағы Қ.Күржіманұлы атындағы №8 орта мектептің оқушылары тіл апталығында белгілі журналист, ақын, шежіреші Мұратбай Ұлықпанмен кездесу ұйымдастырды. Мектептің қазақ тілі мен әдебиеті пәнінің мұғалімі Ақкүрең Бақыт: - оқушыларымыздың арасында журналист боламын деушілер, әдебиетке қызығушылар өте көп. Сондықтан да мектебімізде өтіп жатқан тіл апталығының бір күнін балаларды өзіңізбен жүздестіруге арнасақ дегенбіз. Шақыруымызды қабыл алып, арнайы келгеніңіз үшін көп рахмет, - деп сыйлы қонағына алғысын білдірді. Алдымен журналист өз өмірбаянын айтып, туған жер, өскен мекен, әдебиетке қызығушылығы мен Алматыдағы қарашаңырақ - ұлттық университетке төрт жыл қатынап, қалай оқуға түскендігін айтып берді. Алғаш жазған өлеңдері туралы сыр шертіп, қалтарысы көп журналистік жолда кезіккен қиындықтар һәм қызықтарымен бөлісті. Жат жерде жүргенде өзінің туған топыраққа оралуынасебепші болған – қарынның аштығы емес, рухани аштық, тілдің мәселесі екенін айтты. «Сіздің шығармашылығызбен жақсы таныспын. Жазушылығыңыз бір бөлек болса, ақындығыңыз бір төбе. Бірақ соңғы кездерде байқаймын, өлең жазуды азайттыңыз. Бұл қылығыңызбен сіз бойыңыздағы ақындық өнерге қиянат жасап жүрмін деп ойламайсыз ба?» - деген сұраққа М.Ұлықпан: - Қазақта «Теңіздің қасынан құдық қазба» деген сөз бар. Мен өзімді ешқашан жазушы да, ақын да санаған емеспін. Мен – журналистпін. Не жазсам даоның бәрін осы негізгі кәсібіме сүйеу ретінде пайдаландым. «Ақын» деген ұлы атақ, қасиетті атақ. Шын жазушы, шын ақындардың жанында менің жазғандарым жай әшейін дүние болып қалады. Сондықтан мен өзімді ол атаққа лайықпын деп санамаймын», - деп жауап берді. Кездесу соңында журналист мектеп кітапханасына өзінің кітаптарын сыйға тартты. Мектеп директоры Мұратбай Ұлықпанға шексіз алғысын білдіріп, шығармашылығына табыстар тіледі. Ақкүрең Бақыт, №8 орта мектептің қазақ тілі мен әдебиеті пәнінің мұғалімі: - Мұратбай аға «Мен тек қана журналистпін» дейді. Әйтсе де, оның өлке тарихын, өнер тарландарын зерттеген шығармалары, құпиялы Маңғыстау әлемінің тылсым сырларын ашатын еңбектері оны жазушы, өлкетанушы, шежіреші деп атауға толық құқық береді деп санаймын. Әзілмен түйрей отырып, көп мәселенің түйінін шешетін сатира жанрындағы өлеңдері өз алдына бір төбе. Ағай өткір тілді, тік мінезді, принципшіл адам. Осы қасиеттерінің арқасында қоғамда болып жатқан көптеген маңызды мәселелерді тайсалмай көтеруі, әр шығармасындағы нақтылық, фактілермен сөйлеуі – оның тек қана талантты қаламгер емес журналистиканың жілігін шағып, майын ішкен нағыз кәсіби маман екендігін көрсетеді. Біз мұндай тұлғалармен мақатанамыз. «Ұрпағына ұран болған аталар», «Оралдым ортасына Отанымның», «Баба рухымен табы­су», «Тылсымы терең құпиялы Маңғыстау», «Шоғы батыр және оның ұрпақтары», «Шоғы батыр оралды Маңғыстауға», «Ақ орда­сы Адайдың» секілді еңбектері келер ұрпаққа жазушының қалдырған мол рухани мұрасы. Ағайдан алда әлі талай керемет шығармашылық дүниелер күтеміз, - деп  жүрекжарды пікірін білдірді. Мұратбай Ұлықпанның оқушылармен бұл кездесуі алғашқы емес. Газет редакциясына ағайды арнайы іздеп келетіндер, әсіресе, балалар өте көп. Бірі одан кәсіби журналист ретінде ақыл-кеңес сұраса, бірі Маңғыстаудың тарихына үңіліп, енді бірі сыншыл еңбектерін зерделейді. Араларында ағайдың жазу стиліне еліктеп, ұқсап-бағатындар да аз емес. Ұстаздар мектептеріне шақырып, әдеби кештер ұйымдастырады. Мұның бәрі де ең бірінші ағайдың бойындағы Алла берген таланты болса, келесі кезекте оның тынымсыз еңбегінің нәтижесі, осы еңбектің арқасында келген абырой биігі. Біз де әріптесімізге биігіңіз ешқашан аласармасын, ұрпаққа берер ұлағатыңыз таусылмасын деген тілек білдіреміз.

Айжан НАСЫРОВА