Жаңаөзенде 2019 жылдың үздік жастары анықталды

7-ші мәрте ұйымдастырылған «Жыл үздігі – 2019» қалалық жастар сыйлығын табыстау шарасы бұл жолы Жаңаөзен қаласындағы «Абат» мейрамханасында өтті. Жаңаөзен жастар ресурстық орталығы өткізген дәстүрлі шараға Жаңаөзен қаласының әкімі Мақсат Ибағаров бастаған жергілікті билік өкілдері, облыстық ішкі саясат басқармасының басшысы Ержан Күмісқалиев, облыстық «Жас Отан» жастар қанатының төрағасы Бағдат Қуандық, БАҚ қызметкерлері және жұмысшы жастар көптеп қатысты. Мерекелік шараның алғашқы бөлігі мейрамханаға кіреберісте қонақтарға арнап жайылған дастарханнан басталды. Бұл жерде сыйлы қонақтарды қаланың үздік жайдарманшылары Берік Сұңғатов пен Нұрлыбай Жұмағалиев күтіп алып, әзілге толы бағдарламамен келген меймандардың көңілдерін көтерді. Аяғына ине салып, уатылған шөлмектердің үстінен жалаңаяқ жүріп, тісімен 16 келілік гір тасын көтерген нәзік жанды арудың өнеріне де көпшілік тәнті болды.

Көрме мерекенің көркін келтірді

«Жыл үздігі – 2019» қалалық жастар премиясында дастарханнан дәм татып, қызықты бағдарламаның куәсі болған қонақтардың назарына «Жас прожект» жобасының үздік қатысушылары көрме ұсынды. Мұнда әлеуметтік бағдарлама аясында жасалған қолөнер туындылары, тамақ өнімдері, киім-кешектер таныстырылды. Салтанатты шараның негізгі бөлігінде Жаңаөзен қаласының әкімі Мақсат Ибағаров әр салада жеңімпаз атанған жастарды құттықтап, еңбектеріне табыс тіледі. - Еліміз бойынша жастардың саны 4 млн.ға жуық болса, Жаңаөзенде 37 мыңнан астам жас бар. Биыл жаңаөзендік жастар түрлі салада үздік атанып, абыройымызды асқақтатты. Әлем чемпионатында алтыннан алқа тағынған Бекзат Нұрдәулетов тек Маңғыстаудың ғана емес, бүкіл қазақ елінің мерейін өсірді. Одан бөлек көптеген жастың жеке кәсіппен айналысуына жол ашқан «Жас прожект» жобасын да айтпай кетуге болмайды. Атаулы бағдарламаның жеңімпазы болған 87 жоба бүгінде өз жұмысын табыспен атқарып, халыққа түрлі бағытта әлеуметтік көмек беріп отырғандығы біз үшін үлкен қуаныш, - деген қала басшысы Жастар жылында мұнайлы өлкеде атқарылған шараларға жеке-жеке тоқталды. Одан кейін Мақсат Ибағаров қаладағы жастар саясатын дамытуға қосқан үлесі үшін қала әкімінің Алғыс хатымен 43 белсенді жасты марапаттады. Мерекелік шарада «Жас прожект» жобасының жеңімпазы Жазира Тартубаева, Жаңаөзен жастар ресурстық орталығының жанынан құрылған «Еріктілер корпусының» төрағасы Қыдырқожа Аханов, «Жаңаөзен қайырымды жандар» тобының мүшесі Алдияр Төлеуов және «A Group entertainment» медиа-маркетингтік компаниясының басшысы Ақиқат Шарапатдинов өз салалары жайында баяндама оқыды. Сондай-ақ, «Жас прожект» жобасының үздік қатысушылары арнайы Алғыс хатпен марапатталып, 15 жаңаөзендік жас әр сала бойынша жылдың үздіктері атанды.

2019 жылдың үздік жастары кімдер?

 

«Үздік жас мұғалім» - Саламатова Нағима Алексеевна

А.Құнанбаев атындағы №19 орта мектептің қазақ тілі және әдебиеті пәні мұғалімі. Білім беру жолында үлгілі істерімен танылып, көптеген марапаттардың иесі атанған. «Шебер педагог – 2017» байқауының қатысушысы, қалалық «Тілші мұғалімдер – 2018» олимпиадасының ІІ орын иегері және «Жыл үздігі – 2018» байқауының қатысушысы.

«Үздік жас студент» - Турашева Диляра Талғатқызы

«Каспий» педагогика және салалық технологиялар колледжінің «Дене тәрбиесі және спорт» мамандығының 4-ші курс студенті. Қалалық, облыстық волейбол, баскетбол, жеңіл атлетика, үстел теннисі, футзал спорт түрлерінің жеңімпазы, «Ой-сана» облыстық байқауының 2-ші орын иегері, «Worldskills» Ақтау өңірлік «Дене шынықтыру және спорт» құзыреттілігі бойынша 2-ші орын иегері. Сонымен қатар, «Каспий кубогы» иегері.

 «Үздік жас ерікті» - Жолдыбаев Нұрсерік Ерланұлы

Жаңаөзен қаласы еріктілер корпусының мүшесі. Жаңаөзен қызмет көрсету және жаңа технологиялар колледжінің 3-ші курс студенті. Өңірде жастар саясатын дамытуға қосқан үлесі үшін облыс және қала әкімдігі марапаттарының иегері. «Жастар синергиясы – 2018» және «Болашаққа сеніммен» облыстық жастар саяси лагерінің қатысушысы. «Бизнес 3 күнде» жобасының дамуына атсалысқан жас ерікті.

«Үздік жас мұнайшы» - Нұрғали Нұрсұлтан

«ӨзенМұнайГаз» АҚ қарасты №3 Мұнай газ өндіру басқармасының қызметкері. «ӨзенМұнайГаз» жайдарман құрамасының белді ойыншысы. Жас мамандар кеңесі жұмысына, компаниядағы жастар саясатының белсенді жүргізілуіне атсалысып, Жаңаөзен қаласының әлеуметтік-экономикалық және қоғамдық саяси өмірінің дамуына үлес қосып келе жатқан жас мұнайшы.

«Үздік жас спортшы» - Қазмұқанов Нұрболат Саматұлы

Маңғыстау облысы кудо федерациясының спортшысы, панкратионнан Қазақстан Республикасының спорт шеберіне үміткер. Грепплинг және Панкратион спорт түрлерінен 2001-2002 жылдары жасөспірімдер арасында Маңғыстау чемпионы, Алматы қаласында өткен Кудо чемпионатының жеңімпазы.

«Үздік жас дарын» - Аманжол Қуаныш Серікұлы

«Өнер» мемлекеттік коммуналдық қазыналық кәсіпорнында үйірме жетекшісі. «Домбыра досым» домбырашылар ансамблінің жетекшісі. 2017 жылы «Маңғыстау жұлдыздары» өнер фестивалінің жеңімпазы. Шәкірттері халықаралық, республикалық және облыстық деңгейдегі байқауларда жеңімпаз атанып жүр. Қуаныш Серікұлы сондай-ақ, «Үздік тәлімгер» атағының иегері.

 «Үздік жас арнаулы оқу орын оқытушысы» - Исағалиева Зулфия Асхатқызы

О.Тұрмағанбетұлы атындағы Маңғыстау индустриалды техникалық колледжінің арнайы пән оқытушысы. 2017 жылы Финляндия елінде тағылымдамадан өтті. «WorldSkills» Ұлттық чемпионатының өңірлік кезеңіне көптеген шәкірттер дайындап, жеңімпаз атанған. Қалалық, облыстық деңгейдегі ғылыми-тәжірибелік конференциялардың үздік қатысушысы, білім саласының дамуына атсалысып жүрген жас маман көптеген марапаттардың иегері.

«Үздік жас меценат» - Ізжанова Гүлбаршын Серікбайқызы

«IGS COSMETIC» Жаңаөзен, Ақтау және Алматы қалаларындағы дүкендер желісінің иесі. Қоғамдық өмірге белсене араласып, жастардың бастамаларына қолдау білдіріп келе жатқан жас кәсіпкер. «Nur Otan» партиясының «Кедергісіз келешек» жобасы бойынша мүмкіндігі шектеулі балаларға, «Мектепке жол» акциясы аясында аз қамтылған мұқтаж отбасыларға материалдық және қаржылай көмек көрсетті. Рухани жаңғыру бағдарламасының шеңберінде іс-шараларға демеушілік етіп келеді.

«Үздік жас әлеуметтік қызметкер» - Жұмадиева Жазира Әмірқызы

Жазира Әмірқызы - №6 орта мектепте әлеуметтік педагог қызметінде. Өскелең ұрпаққа білім берудегі және тәрбиелеудегі қол жеткізген жетістіктері үшін көптеген құрмет грамоталарының иегері. Халықтың қорғалмаған топтарына, соның ішінде жетім балалар, аз қамтылған және көп балалы отбасының балаларына көптеген материалдық және қаржылай көмек көрсеткен жас қызметкер.

«Үздік жас мемлекеттік қызметкер» - Боранғұл Мақсат Хыдыргелдіұлы

Жаңаөзен қалалық ішкі саясат бөлімінің бас маманы. Маңғыстау облысы және Жаңаөзен қаласының дамуына үлес қосқаны үшін көптеген марапаттардың иегері атанған. «Nur Otan» партиясының бағдарламалық мақсаттары мен міндеттерін іске асыруға үлес қосып, Жаңаөзен қаласының 50 жылдығында орай мерекелік төсбелгімен марапатталды.

«Үздік жас көшбасшы» - Тулеуов Алдияр Юнусұлы

«Жаңаөзен қайырымды жандар» еріктілер тобының көшбасшысы. Жаңаөзен қаласының қоғамдық-саяси өміріне белсене қатысқаны үшін көптеген марапаттардың иегері. Маңғыстау облысы әкімдігінің «Ерен еріктілік» номинациясының жеңімпазы. «Зерен - 2018» Республикалық  жастар саяси лагерінің қатысушысы. Топ құрамында мұқтаж жандарға көмектесіп, игі іс-шаралардың ұйымдастырады.

«Үздік жас кәсіпкер» - Шарапатдинов Ақиқат Абдуллаұлы

«A Group Entertainment» жауапкершілігі шектеулі серіктестігінің басшысы. «Жыл үздігі - 2018» байқауының қатысушысы, көптеген қайырымдылық іс-шаралардың еріктісі. Қаланың әлеуметтік маңызы бар жобаларына өз үлесін қосып жүр. Бүгінде Ақиқат 54 бизнес жобаның авторы. Алдағы уақытта қала имиджін көтеруді мақсат етіп, «Елім маған не береді емес, мен еліме не беремін?» деген принципті ұстанатын жас кәсіпкер.

«Үздік жас тәрбиеші» - Елубаева Әсемгүл Дүйсенғалиевна

№16 «Ертегі» балабақшасының тәрбиешісі. Жастар саясатын дамытуға қосқан үлесі үшін көптеген марапаттардың иегері. «Жас Отан» жастар қанатының белсендісі. Шәкірттері республикалық, облыстық байқаулардың жеңімпаздары. «Жастар Отан» саяси лагерінің қатысушысы.

«Үздік жас паралимпиадалық спортшы» - Жолдасбаев Талғат Орынбайұлы

Ат спорты бойынша халықаралық және республикалық турнирлерге қатысып, жүлделі орындарға ие болып жүрген паралимпиадалық спортшы. Сонымен қатар жастар корпусын дамытуға арналған «ZhasProject» жобасының жеңімпазы.

«Үздік жас тәлімгер» - Әлен Самат Бейнеубайұлы

Мүмкіндігі шектеулі жандарға арналған «Нұр-Әлем» ат спорты клубының жетекшісі. Маңғыстау облысының әлеуметтік-экономикалық дамуына және Жаңаөзен қаласының спорт саласын дамытуға қосқан үлесі үшін көптеген марапаттардың иесі атанған. Мүмкіндігі шектеулі жандарды халықаралық, республикалық турнирлерге дайындап жүрген жас тәлімгер.

Айжан НАСЫРОВА

[gallery td_select_gallery_slide="slide" ids="89402,89400,89399,89401"]