Әбіш Кекілбайұлының туғанына 80 жыл толды

"Бүгін - айрықша мереке, мерейлі күн. Бүкіл парасатты ғұмырын туған елінің жарқын болашағы үшін сарп еткен ұлы жазушы, асқан білімпаз, ойшыл, мемлекет және қоғам қайраткері Әбіш Кекілбайұлының туғанына 80 жыл толып отыр", деп жазды Маңғыстау облысының әкімі С.Трұмов фейсбук парақшасында. "Ол қазір жанымызда болмаса да, жадымызда. Оның қаламынан туындаған рухани мол мұрасы, егемен елдіктің шаңырағын тіктеп, іргесін бекітудегі, ұлт рухын үстеудегі игі істері мен көсем сөздері мәңгі ұмытылмақ емес. Бұл күндері күллі Қазақ елі адамзаттың Әбіші атанған ұлы тұлғасын ұлықтау, өнегесін парықтау үстінде.Туған топырағы киелі Маңғыстауда еңселі ескерткіші мен музейі бой көтерді. Нұр-Сұлтан, Алматы қалаларында атына көшелер беріліп, Кекілбаевтану ғылымы даңғыл кеңістікке жол тартты. Кең байтақ Қазақстанның қай аймағына барсақ та, қабырғалы елдің, текті жұрттың біртуар тұлға, дара болмыс иесін мақтан тұтып, марқая сөйлейді. Өйткені, Әбіш Кекілбаев халқымыздың намысын қорғаған, ұлтының ұлағатын ту еткен, елім деп еңіреген есіл ердің нақ өзі! Кекілбайұлы секілді кемеңгер, тау тұлғаларымыз көп болғай! Той құтты, тағылымы, шапағаты мол болсын, ардақты ағайын!", делінген жазбада.