Мал азығы: Қымбатшылық қысып барады

Қазір аудан тұрғындарының басты тақырыбы – жем-шөп тө­ңі­регінде өрбуде. Оның себебі де түсінікті. Ауданда мал­дың басы жыл өткен сайын артып келеді. Соған сай оған қа­жетті мал азығына сұраныс та өсті. Мал азығы бағасының мың құбылуы да әдетке айналды. «Кебек алдың ба? Бағасы қан­шадан болып жатыр?» деген тұрғындар әңгімесін жиі ес­тиміз. Алдымен мән-жайды білмекке аудандық ауыл­ ша­руа­шы­лығы бөліміне хабарласқан болатынбыз.

- Биылғы жылы жылдағымен салыстырғанда шөп шабушы бригадалар саны аз, өйткені еліміздегі індетке байланысты карантиндік шаралардың күшейтілуі негізінен жұмыс күші жеткіліксіз. Биылғы жылы шабындықта шөп сұйық, селдір болғандықтан шөптің түсімі төмен. Былтырғы жылы ауданда 27 бригада шөп шапса, биыл 14 бригада шөп шабу науқанына қатысып, 4150 тонна шөп мал азығын дайындады. 2020 жылдың басынан бері ауданға өзге облыстардан 5602 тонна шөп әкелінді. Көрші облыстардан келетін шөптің бір орамының бағасы 12000-15000 теңгеден сатылуда. Соңғы 1 айда жеке кәсіпкер М.Қармысов 1300 тонна орам шөп алып келді. Ауданда мал азықтық жем саудасымен 11 жеке кәсіпкер айналысады.

Салмағы 18 келі болатын 1 қап жем бағасы 1300-1350 теңге болса, 20 келілік жем 1400-1500 теңгеден сатылуда. «Каспий» ӘКК мен «Сегізбай ата» өндірістік кооперативімен бірлесіп, 180 тонна жем әкеліп, тұрғындарға 20 келі жемді 1360-1400 теңгеден сатты. Қазіргі уақытта жеке кәсіпкерлер қоймалары мен вагондарында саттықта 360 тонна жем қоры бар. Биылғы жылғы қуаңшылықтың әсерінен шөп шығымы аз болғандықтан, өзге облыстардан, яғни Атырау, Ақтөбе облыстарынан қымбаттау келеді. Соның салдарынан аудан тұрғындарына кебек жем алуға тура келеді. Ал кебекке сұраныс көп, тіпті вагонның басынан қоймаларға жетпей, өтіп кетіп жатыр. Нарықтың заңы – сұраныс пен ұсынысқа сай құрылады, - деп жауап қатты.

Осы мәселе тұрғысында «Nur Otan» партиясының аудандық филиалы төрағасының бірінші орынбасары А.Ордабаева, аудан әкімінің орын­ба­сары А.Аққұлов «Сегізбай-ата» өндірістік кооперативіне барған болатын. Қоймада сақталған 20 келі 1 қап кебек жем – тұтынушыларға 1360 теңгеден сатылымда екен. Сонымен бірге тұтынушылардың тіліне тиек етіп жүрген 1 қап жем салмағының 20 келіден кем болуы жағдайын анықтау мақсатында бірнеше қап таразыға салып өлшенді, тексерілді.

Осы мезетте тұтынушыларды сөзге тартқанымызда, «Әзірге төрт түлік азығынан таршылық көріп отырған жоқпыз. Алайда былтырғыға қарағанда баға қымбат. Бағаның тұрақсыздығы мен қымбатшылығы қарапайым отбасылар үшін ауыр тиетіні жасырын емес», - дейді ауыл тұрғындары.

«Жем бағасын тұрақтандыру және жем қорын ұлғайту бойынша келіссөздер жүргізілуде. Бүгінгі таңда аудан кәсіпкерлеріне мал азығын ба­рынша төменгі бағада ұстау ескертілді», – дейді мамандар. Алдағы уақытта да аудан бойынша мал азығын жеткізу қызметтері күнделікті бақылауда ұс­талып, жұмыстар ұйымдастырыла бермек. Қымбатшылық қысып тұрған заманда жем-шөптің бағасы да шарықтамай, тұрғындардың қалтасы көтеретіндей болуы тиіс.

Дина УТЕПБЕРГЕНОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.