Балықшылар демалыс орны бой көтереді

Түпқараған аудан әкімдігінің ғимаратында аудан әкімі А.Қосуақовтың төрағалығымен балық аулау маусымына дайындық шараларының барысы туралы жиын өтті. Жиынға аудан әкімінің орынбасары Ө.Тлепов, аудандық ауыл шаруашылығы бөлімінің басшысы Д.Утебалиев, аудан ардагерлері мен балықшылар тобының өз арасынан сайланған көшбасшылары қатынасты.

Айта кетейік, балықшылар мен балық шаруашылығы ардагер­лерінің ұсыныс-пікірлері мен мәселелерін талқылау мақсатын­дағы жиын былтырғы жылы да осы кезде өткен болатын. Жиын бұл жолы да еркін форматта өтті.

Жиын барысында аудандық ауыл шаруашылығы бөлімінің басшысы Д.Утебалиев бүгінгі таңдағы балықшылар мәселесі бойынша баяндама жасады.

Жиында сенаторлар қабылдаған Каспийдегі балық аулау аймағын ұлғайтуға қатысты заң жобасы да сөз болды. Каспийдің қазақстандық бөлігі 15 теңіз милін құрайтын болады. Құжатта браконьерлермен кү­ре­судің нормалары жазылған, алайда өз ісіне адал балықшы­ларға қор­қудың қажеті жоқ. Егер бұрын қазақстандық кемелер теңізге күндіз ғана шыға алған болса, енді жаңа түзетулерге сәйкес тәуліктің кез-келген уақытында балық аулауға мүмкіндік бар.

Сонымен қатар аудан әкімі А.Қосуақов балық маусымына да­йындық шаралары сөз болған жиын барысында Баутин ауылы, Аташ елді мекенінің Ә.Жангелдин көшесінде (бұрынғы мә­дениет үйі ғимаратының орны) биыл балықшылар демалыс орны бой көте­ре­тіндігін мәлім етті.

Балықшылар демалыс орнында кіреберіс арка, спорттық шынығу алаңы, балалар алаңы, автотұрақ пен шатырлы орындықтар және мүсінші Болатбек Салаевтың еңселі балықшылар ескерткіші орнатылатын болады. Мүсіннің биіктігі 3,60 метр болса, тұғыр биіктігі 2,20 метрді құрайды. Демалыс орны ауыл тұрғындарына биыл пайдалануға берілмек.

"Ақкетік арайы" газеті

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.