Бүгін 5 жыл бұрын егіз қызға үйленіп, дүркіретіп той жасаған ақтаулық егіз жігіт Төребек пен Асыл, Жолдасбек пен Айым облыс әкімі С.Трұмовтың қабылдауында болды. Бұл туралы облыс әкімінің баспасөз қызметі хабарлады.
Ақтауда психологиялық-логопедиялық орталық ашып, мектепке дейінгі балаларды оңалтуға атсалысып жүрген егіз жұп енді мектеп ашуды ұйғарыпты. Аймақ басшысынан осы бастамасына қолдау көрсетуді, тиісті мамандардың кеңесін алуға көмек беруді сұрады. С.Трұмов жастардың игі істеріне сәттілік тілеп, тиісті басқарма басшыларына заң аясында мәселені шешуді тапсырды.
Жастар Орал қаласында танысқан. Олар 2015 жылы қазанда шаңырақ көтерген. Жігіттер 10 минут аралықпен туған. Асыл және Айыммен бірінші болып егіз жігіттердің кішісі Жолдасбек танысыпты. "Ол дүкенге аяқ киім сатып алу үшін келген. Өзіне таңдап болған соң, сатушы Айымнан тағы да осындай аяқ киім сұраған. "Сенің егізің бар ма?" деген қыз сұрағына "иә" деп жауап берген. Осы кезде қыз оған өзінің егізі жайлы айтқан. Қос егіздер қазір екі-екіден ұл-қыз тәрбиелеп отыр. Балаларының болашағынан зор үміт күтеді.
Айта кетейік, бүгін облыс әкімі алдын ала қабылдауға жазылған тұрғындарды қабылдады. Карантин жағдайына байланысты барлық санитарлық талаптар сақталған.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
