Тегін дәріні қалай аламыз?

Халықты дәрі-дәрмекпен қамтамасыз ету медициналық көмек көрсетудің басты құрамдас бөліктерінің бірі болғандықтан, амбулаторлық дәрі-дәрмекпен қамтамасыз етуді жетілдіре түсу—денсаулық сақтауды дамытудың мемлекеттік бағдарламасының басым бағыттарының бірі. Ал тегін медициналық көмектің кепілдік берілген көлемінің (ТМККК) қазіргі моделінде бүкіл халыққа қажетті және көрсетілетін қызметтердің ең аз жиынтығы қамтылған.

«Әлеуметтік медициналық сақ­тандыру қоры» Маңғыстау филиалы ақпараттандыру бөлімінің бас сарапшысы Сәуле Наушина ТМККК аясында тегін дәрі-дәрмектерді қалай алуға болатындығы туралы толық­қанды ақпарат жеткізді.

– Тегін дәріге қол жеткізу үшін алдымен медициналық-санитарлық алғашқы көмек көрсететін емханаға, фельдшерлік-акушерлік пунктке немесе дәрігерлік амбулаторияға (отбасылық денсаулық орта­лығына) бекітілу қажет, – деді ол. – Екін­шіден, науқас ауруы бойынша диспан­серлік есепте тұруы керек. Ол үшін өзіңіздің учаскелік терапевтке хабарласып, тиісті сынақтардан өтіп, маманның қорытындысын алу керек. Тегін рецептіні ҚР ДСМ 2017 жылғы 29 тамыздағы №666 «Тегін медициналық көмектің кепілдік берілген көлемі шеңберінде, дәрілік заттармен және медициналық бұйымдармен қамтамасыз етілуге, оның ішінде белгілі бір аурулары (жай-күйлері) бар азаматтар­дың жекелеген санаттарын, амбулаторлық деңгейде тегін және (немесе) жеңілдікпен берілетін дәрілік заттармен және меди­циналық бұйымдардың тізбесін бекіту туралы» бұйрығын негізге ала отырып, тек учаскелік терапевт пен мамандандырылған маман жазып береді. Рецепт бойынша дәрі-дәрмекті емханадан алуға болады. Препарат үшін ақы төлеудің қажеті жоқ, берілген рецепт пен жеке куәлікті фармацевтке ұсыну жеткілікті. Алайда берілген дәрі-дәрмектің атауы дәрігер тағайындағаннан өзгеше болуы да мүмкін. Мысалы, «Парацетамол» – халықаралық патенттелмеген атау, ал «Тайлол», «Цефекон», «Парацетамол» – сауда атаулары. Биыл Қазақстан Республикасы Денсаулық сақтау министрінің 2020 жылғы 9 қаңтардағы №ҚР ДСМ-1/2020 бұйрығымен №666 бұйрыққа өзгерістер енгізілді. Яғни МӘМС (міндетті әлеуметтік медициналық сақтандыру) жүйесі шеңберінде бірыңғай дистрибьютор жүйесі арқылы сатып алынатын дәрілік заттар тізімі 225 атауға кеңейтілді. Оның ішінде 161 препарат ересек пациенттерді және 192-і – балаларды емдеуге арналған дәрілік заттар. Сонымен қатар МӘМС жүйесіне қатысушы пациенттер жұқпалы, протозойлық, паразиттік аурулар, гельминтоздар, саңырауқұлақ инфекциялары, ас қорыту аурулары, қан, ағзалар және иммундық механизмді қамтитын жекелеген бұзылулар, жүйке жүйесінің аурулары, көру, есту және тыныс алу органдары, тері және тері асты жасушасы, несеп-жыныс жүйесі органдары, сүйек-бұлшық ет жүйесі және дәнекер тін, сондай-ақ жүрек-қан тамыр аурулары сияқты 64 топ аурулары бойынша дәрі-дәрмектерді тегін алу мүмкіндігі бар. Амбулаторлық деңгейде емделетін науқастарға арналған коронавирустан емдеуге арналған 5 жаңа дәрі-дәрмек №666 бұйрыққа енгізілді. Бұл қабынуға қарсы препараттар – Парацетамол, Ибупрофен және антикоагулянттар Ривароксабан, Апиксабан және Дабигатран. Осы мәселелер бойынша сұрақтар туындаған жағдайда азаматтар қорға Qoldau 24/7 мобильді қосымшасы арқылы немесе 1406 байланыс орталығының телефоны арқылы хабарласа алады.

Фатима Мұстажапқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.