Мүгедек адамның құқығы қорғалды

Жауапкер жолда жүру ережесін бұзып, жол-көлік оқиғасын жасаған. Ол талап қоюшының денсаулығына зақым келтірген. Яғни зардап шегуші бір аяғынан айырылып, өмір бойы еңбекке жарамсыз, мүгедек болып қалған, - деп хабарлайды mangystaumedia.kz сайты.

Талап қоюшы сотқа жүгініп, мүгедектіктен еңбекке жарамсыз, еріксіз жұмыссыз қалғанын, несиелерінде төлей алмай отырғанын, бұрын бір емес, екі мекемеде жұмыс істегенін және еміне көп қаражат жұмсалғанын айтып, материалдық шығындарды, асырауына қаражат және өмір бойы мүгедек болып қалуына байланысты моральдық зиян өндіруді сұрады.

Ақтау қаласының азаматтық соты баспасөз қызметінің айтуынша, жауапкер материалдық көмек көрсету былай тұрсын, талап қоюшыдан кешірім де сұрамаған. Тіпті, сот отырысы кезінде де талап арызбен толық келіспей, бітімгершілікке де келмей, талап арызды қанағаттандырусыз қалдыруды сұрады.

Сот заң талаптарын басшылыққа алып, денсаулыққа келген зиянды, жұмыссыз қалғанын, жоғалтқан табысын және өмір бойы мүгедек болып қалғанын ескеріп, моральдық зиянды өндіру жөнінде шешім қабылдады.

Сот шешімі заңды күшіне енді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.