©
Облыс орталығында ҚР журналистер одағының мүшесі, тележурналист Гүлнұр Жадринаның қолға алуымен қазақ тілді балаларға арналған «Даму медиа» мектебі жұмысын бастады. Орталықтың салтантты ашылуына Ақтау қаласы әкімінің орынбасары Тілек Қошмағамбетов, облыстық мәслихаттың депутаты Абзал Меңдібаев, халық ағарту ісінің үздігі Оразғали Өтеулиев пен қала тұрғындары қатысып, жаңа бастамаға сәттілік тіледі. Орталықтың қызыл лентасын ҚР ағарту ісінің үздігі Ордалы Қосай мен кәсіби сынықшы Айнұр Есмурзина қиып, ізгі тілегін арнады.
Оқу ордасы мектеп жасындағы оқушыларды шешендік өнерге баулып, тележурналистика мен актерлік шеберліктің қыр-сырын меңгертіп, сахна тіліне жаттықтырып, кез келген ортада өз ойын еркін жеткізуге үйретпек.
- «Даму медиа» мектебі - тек қазақ тілді балаларға арналған Маңғыстаудағы тұңғыш білім ордасы. Медиа мектепке 4 сыныптан 11 сыныпқа дейінгі оқушылар қабылданады. Білім ордасы өз жұмысын 1 қарашадан бастап кетті. Қазіргі таңда медиа мектепте 5 топ бар. Сенбілік топқа облысымыздың Жетібай, Шетпе, Мұнайлы аудандарынан және Ақшұқыр, С.Шапағатов ауылдарынан оқушылар келіп, білім алуда. Оқу ордасында бүгінгі таңда тәжірибелі журналист, оператор, актер, видеоинженер жұмыс жасайды, - дейді орталық басшысы Гүлнұр Жадрина.
Медиа мектепте дәріс алу 3 кезеңнен тұрады. Бірінші кезеңде балалар тәжірибе жинақтайды. Екінші кезеңде түрлі сала үздіктерімен, self-made тұлғалармен кездесулер ұйымдастырылып, шәкірттер сұхбат жүргізуге дағдыланады. Үшінші кезеңде аймақтағы өндіріс ошақтарына, зауыт, фабрикаларға барып, нағыз журналистің жұмысын атқаруға машықтанады.
- Осындай қадамдар арқылы тележурналистика саласының қыр-сырымен танысып, мәлімет жинау мен таратудың тәсілдерін үйренеді. Таспаға түсірілген жобалар медиа мектептің Youtube каналында, әлеуметтік желідегі парақшаларында жарық көреді. Ең үздік оқушылар әлеуметтік видеороликтерге түсу мүмкіндігіне ие болады. Медиа мектеп оқушыларының ашылуына бар мүмкіндік жасалады. «Даму медиа» мектебі республикалық балаларға арналған баспалармен келіссөздер жүргізді. Өлкемізге танымал тұлғалармен сұхбат ұйымдастырып, мақалалар жариялауларына толық мүмкіндік бар. Балаларды шығармашылыққа тарту мақсатында түрлі әдеби бәйгелер де өткізілетін болады. Еліміздің болашағы-өскелең ұрпақтың қолында. Сондықтан да компьютер мен гаджет құлына айналып бара жатқан балалардың назарын кітапқа аудару, шығармашылық шабыт беру, жол сілтеу - «Даму медиа» мектебінің басты ұстанымы. Бизнес ретінде бұл пайда көзі емес. Сондықтан, мектепті әлеуметтік жоба ретінде қарастырған жөн, - дейді Гүлнұр Жадрина.
Мұнда дәрістер аптасына 1 сағаттан үш рет жүргізіледі. Аптаның бірінші сабағында оқушылар актерлік шеберлік пен сахна тіліне үйренсе, екінші сабақта тележурналистика негіздерінен дәріс алады. Ал, аптаның соңғы сабағында камера алдында жұмыс жасайды.
- «Даму медиа» орталығының ашылғаны жайында анам әлеуметтік желіден оқып, маған қатысуға кеңес берді. Сөздік қорымды дамыту үшін әрі актерлік шеберліктің қыр-сырын үйрену үшін қатыстым. Әр сабағымыз өте қызықты өтеді. Аз уақыттың ішінде біраз нәрсе үйрендім, - дейді 14 жастағы Жанира Аралжанова.
Венера МИРЛАН,
Суреттерді түсірген Талант ҚҰСАЙЫН
[gallery td_select_gallery_slide="slide" ids="42532,42525,42531,42530,42528,42533,42526"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
