©
Талдықорған қаласында дзюдодан «Қысқы демалыс» күндеріне арналған жасөспірім ұлдар мен қыздар арасында дәстүрлі ашық республикалық турнир мәресіне жетті. Жарысқа көршілес мемлекет Қырғызстан мен еліміздің барлық аймағынан жиналған 2003-2005 жылы туған 752 балуан қатысып, боз кілемнің көркін қыздырды.
Дүбірлі додада жерлестеріміз, облыстық «Жас батыр» мамандандырылған балалар мен жасөспірімдер спорт мектебінің үш бірдей шәкірті топ жарып, облыс мерейін өсірді. Тарқатып айтар болсақ, 55 келі салмақта Мерей Мархамбетов алтыннан алқа тағып, тұғырдың ең биік сатысынан көрінді. Ал қыздар арасында 40 келі салмақта Мерейлім Кеңесбекова екінші орынды олжалап, күміс медальді кеудесіне тақса, 63 келі салмақта Жансұлу Амандық үшінші орынды қанағат тұтты.
- Біз бұл жарысқа үлкен дайындықпен бардық. Жалпы жарысқа мектебімізден 13 қызды апарған едім, оның екеуі жүлделі орыннан көрініп, үмітімізді ақтады. Еліміздің барлық аймағынан қатысқан 752 спортшының арасынан топ жару да оңай емес. Шәкіртім Мерейлім Кеңесбекова 5 кездесу өткізіп, барлығын айқын басымдылықпен жеңіп, шешуші сәтте Астанадағы Қажымұқан Мұңайтпасов атындағы олимпиада резервінің республикалық мамандандырылған мектеп-интернатының спортшысына есесін жіберді. Осылайша, күміс медальді олжалады. Тағы бір шәкіртім Жансұлу Амандық 5 кездесуін сәтті аяқтап, алматылық аруға ұтылып қалды. Бұл жолы бұйырғаны қола медаль болды. Жарыстан соң балуандарымыз бір күндік жаттығу лагеріне қатысып, шеберліктерін шыңдады. Жастарымыздың осындай жарыстарға қатысуына қолдау көрсетіп, жағдай жасап отырған облыстық дене шынықтыру және спорт басқармасының басшысы Бекболат Байжановқа, облыстық дзюдо федерациясының басшылығына, мектебіміздің директоры Манарбек Бисекеновке ризашылығымызды білдіреміз, - дейді КСРО-ның спорт шебері, облыстық «Жас батыр» мамандандырылған балалар мен жасөспірімдер спорт мектебінің бапкері Мәншүк Баданова.
Венера МИРЛАН
Тағы оқыңыз: Ақтауда эко-қала салынатын болды
[gallery td_select_gallery_slide="slide" ids="47003,47006,47004,47007,47005"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
