Жаңаөзенде «Арлан» спорт кешені ашылды

Жаңа жыл қарсаңында Жаңаөзен қаласында тағы да бір әсем ғимарат бой көтеріп, балалардың игілігіне пайдалануға берілді. Бейсенбі күні «Шаңырақ» шағынауданы, «Бөкен» базарын жанында Мемлекеттік Рухани жаңғыру бағдарламасы аясында «Арлан» дене шынықтыру және сауықтыру кешенінің салтанатты ашылу рәсімі өтті. Мерекелік шараға Жаңаөзен қаласының әкімі Мақсат Ибағаров, мемлекеттік атқарушы органның өкілдері, қала тұрғындары және балалар қатысты. «Арлан» спорт кешенінің құрылысы осыдан он жыл бұрын басталған. Бұл нысан өңірлердегі спорттық инфрақұрылымдарды дамыту мақсатында, рухани жаңғыру бағдарламасы аясында іске асқан дене шынықтыру және сауықтыру кешені. Мұнда арнайы жабдықталған спорт залдарында тәжірибелі жаттықтырушылардың жетекшілігімен футбол, бокс, күрес, дзюдо, каратэ, таэквондо және тағы басқа секциялар жұмыс істейтін болады. Ал бұл өз кезегінде жаттықтыру процесстерінің тиімділігін арттыруға мүмкіндік береді. - «Спорт арқылы мемлекетті танып, спорттың деңгейіне қарап елдің жалпы дамуын байқайды. Бүгінде «Елім-жерім» деп соққан жалынды жүрегі бар, халқының игілігіне  қызмет атқарып келе жатқан жастарымыз көп. Жақында ғана Рахат ауылында үлкен спорт кешені ашылып еді. Бүгін тағы да қаламызда бір спорт нысаны пайдалануға беріліп отыр. Мұның барлығы жас буынға спортпен шұғылдануы үшін жасалып жатқан жағдай. Бүгінгі мереке құтты болсын. Осы спортзалдан балалар жаттығып, Әлем чемпионы болуларына тілектеспін», - деді қала басшысы өзінің құттықтау сөзінде. Спорт – халықаралық аренадағы елдің айнасы. Спортшылар Жас буынға үлгі болатын, әр спортшы өз елінің шынайы патриоты, жер-жаһанда халқының абыройын асқақтатып, намысын қорғап, мемлекетінің туын биікке көтеруге бар күш-жігерін аямай салуда. Ендеше, келесі құттықтау сөз ардагер мұнайшы, жеке кәсіпкер Али Агисов , жеке кәсіпкер: «Арлан» спорт кешенін  менің төрт  балаларым қосылып салды. Бұл жерде бұрында «Коммунальный» дейтін клуб болып еді. 2009 жылы осы жерді сатып алдық. Ұлдарым футбол ойнағанды жақсы көреді. Қаладағы спорт залдарға барып жаттығып жүргенде  қиындық көріп жүрді. Бір спортзалдың ішінде жылу жоқ  болса, екіншісі кіргізбейді екен. Жан–жақта жаттығын жүрген сәтінде «Әке өзіміз неге үлкен спортзал» салмаймыз? – деген ұлдарымның мақсаттарын қолдап, демеушілік көрсетіп, бағыт-бағдар бердім. Сонымен несиессіз өзіміздің қаражатымызбен кешенді салып бітірдік. Алдағы уақытта спорт секцияларын көбейтеміз. Ғимараттың алдына да күрделі жөндеу жұмыстарын жүргіземіз Шараның соңында футболдан қайырымдылық ашық турнир өткізілді. Халықтың экономикалық, әлеуметтік биіктерге көтерілуі үшін рухани байлықтың, денсаулықтың аса қажеттілігі баршаға мәлім. «Спорт – саулық негізі, саулық байлық негізі», - деп бекер айтылмаған. Гүлденген экономиканы дені сау, саналы азаматтар жасайды. Сондықтан,  салауатты өмір салтын қалыптастыру, насихаттау шараларын белсендірек жүргізгеніміз абзал.

Гүлсім МҰРЫНОВА