Ақтауда еркін күрестен Х республикалық турнир аяқталды

Ақтауда еркін күрестен жасөспірімдер арасындағы Х республикалық турнир аяқталды. Ақтау қаласында «Маңғыстау-Арена» спорт кешенінде 6–8 желтоқсан күндері Қазақстан Республикасының Тұңғыш Президент күніне және Қазақстан Республикасына еңбегі сіңген жаттықтырушы Магаммед Магаммедұлы Расуловты еске алуға арналған турнир өтті. Еркін күрестен жасөспірім ұлдар (2003-2005 ж.т) және қыздар (2004-2006 ж.т) арасында жарыста Маңғыстау облысының спортшылары  6 алтын, 4 күміс және 8 қола медалға ие болып, командалық есеп бойынша топ жарды. Байрақты додада көрші елден Өзбекстан, Қарақалпақстан құрамасы және Алматы, Қызылорда, Ақтөбе, Қостанай, Атырау құрамалары мен Маңғыстау облысынан үш бірдей құрама: Ақтау қаласының МООРМ БЖСМ, Мұнайлы ауданы Басқұдық ауылының БЖСМ және Жаңаөзен қаласындағы БЖСМ қатысты. 200-ден астам ұл мен 30-ға тарта қыз боз кілемге шығып жүлдеге таласты. Жарыстың бас төрешісі Нұрсұлтан Амандықтың айтуы бойынша: «Магаммед Расулов турнирі жақсы дәрежеде өтті. Бұл жарыстың ең есте қалатыны боз кілемде 60 кг–да Өзбекстан елінің чемпионы, Еркін күрестен 2019 жылғы Азия чемпионатының қола жүлдегері Иззат Сабиров пен жерлесіміз, Қазақстан чемпионы, жасөспірімдер арасында 2018 жылғы Азия чемпионатының күміс жүлдегері Амирханов Эмиль арасында өтті. Екеуі де мықты палуан. Бірақ, Эмиль ініміз 2–1 есебімен жеңіліп қалды. Спорт болғасын бірде жеңесің, бірде жеңілесің! Ештеңеге мойымау керек. Сонда сен чемпион боласың», деп қорытындылап өтті.

Айбек Мұханов

Мұнайлы ауданы Басқұдық ауылының балалар мен жасөспірімдер спорт мектебінің әдіскері