Батыр ауылында тағы екі отбасы үйлі болды

Биыл қараша айында облыстық орталық мешіт жамағатының көмегімен Мұнайлы ауданы Батыр ауылында атажұртым деп келіп, баспанаға мұқтаж болып жүрген отбасыға үй салып бергенін сүйіншілей хабарлаған едік. Жақында осы ауданда тағы бір қайырымды шара жүзеге асты. Мұнайлы ауданының «Миғраж» мешіті жанындағы «Үммет жастары» қайырымдылық қоры «Әр қазақ – менің жалғызым» атты қайырымдылық акциясының эстафетасын үш ай бұрын қабылдап алған болатын. Осы уақыт ішінде «Үммет жастарының» ұйытқы болуымен мүмкіндігі шектеулі екі адамға Батыр ауылында баспана салынды. Осынау сауапты да игілікті іске «Жас Отан» жастар қанаты қолдау көрсетіп, көптеген жомарт жандар атсалысты. Оқи отырыңыз: Дзюдошы Айбек Имашев мұнай саласына ауыса ма? Көп балалы екі отбасыға үйлерінің кілтін табыстауға арналған жиында аудан әкімі Рахат Елтизаров құтты болсын айтып, игі тілегін жеткізді. Жиналғандар алдында лебізін білдірген Маңғыстау облысының бас имамы Әнуар Ізімбайұлы қайырымдылықтың шариғи мәніне тоқталды. - Халқымызда «Қайырымдылық жасасаң, қайырын өзің көресің» деген нақыл бар, - деді ол. - Алла Тағала Құранда, «Әнғам» сүресінің 160-аятында: «Бір жақсылық істеген адам он есе сауапқа ие болады», деп баяндаған. Ал ата-бабаларымыз «Ер қолында мал тұрмайды, елек ішінде су тұрмайды», деген екен. Жомарттық – көркем мінездің бір көрінісі. Жомарттық жасауда адамзаттың абзалы болған пайғамбарымыз Мұхаммед (оған Алланың салауаты мен сәлемі болсын) алдына жан салмайтын. Алла Елшісі барлық ізгі амалда адамзатқа өшпес өнеге қалдырды. Осынау өнегелі істі, яғни сүннет амалды жаңғыртып жатқан жомарт жандарға маңғыстаулық имамдар атынан айрықша алғыс білдіремін. Алла разы болсын. Мүфтияттың да сан-салалы қызметінің бірі – қайырымдылық. «Зекет» қорының ұйытқы болуымен 150-ден астам мұқтаж жанға үй берілді. Бұл бағыттағы игі істер одан әрі жалғаса бермек.

    Валентина ҚОЗЫБАҚОВА