Маңғыстауда діни ахуалды жақсарта түсу жолдары талқыланды

Ақтау қаласының әкімі Ғалымжан Ниязов пен Маңғыстау облыстық дін істері басқармасы басшысының міндетін атқарушы Гүлмира Балғожаева Нұр-Мүбарак университетінің проректоры Қайрат Құрманбаевпен кездесті. Кездесу барысында Маңғыстау облысындағы діни ахуалды жақсарту жолдары және мамандармен қамту туралы мәселелер талқылады. Дін саласындағы көкейдегі көптеген сауалға тұшымды жауап алған Ақтау қаласының әкімі Ғалымжан Мұқырұлы ислам ғалымының пікірлеріне мұқият ден қойды. - Біз бұл мәселелерге дәл мамандар секілді түпкілікті үңіле бермейміз. Сіздер діннің ішкі түйткілдерін жақсы меңгергендіктен, бұл талқыланған тақырыптар бізге көптеген мағлұматтар берді, - деп өз лебізін жеткізді ол. - Жат діни ағымдарға тойтарыс беру шаралары дұрыс діни бағытта білім алған мамандар арқылы жүзеге аспақ. Сондықтан Нұр-Мүбарак университетінде осы мақсатта маман даярлаумен қатар, ең қажетті әрі маңызды ғылыми еңбектерді де жарыққа шығаруға назар аударылыр жатыр, - деп, дін саласындағы тәжірибесімен бөліскен проректор Қайрат Құрманбаев университеттің елдегі діни ахуалға қатысты мүмкіндіктеріне тоқталып өтті. Діни қызметкерлер мен дін саласындағы мамандардың білігін арттыру мақсатындағы семинар-тренингтер, арнайы курстар, кітаптар және әдістемелік құралдармен қамтамасыз ету мәселелерімен қатар болашақ түлектерді аймаққа жұмысқа тарту мәселесі әңгіме өзегіне айналды. Белгілі теолог, діни экстремизм мен терроризмге қарсы салада еліміздегі ең білікті мамандардың бірегейі Асқар Сабдин өз тәжірибесіне сай ойларын ортаға салды. Маңғыстау облыстық ДІБ басшысының міндетін атқарушы Гүлмира Қуатқызы кездесу барысында Нұр-Мүбарак университетімен арадағы меморандум аясында жасалатын жұмыстардың одан әрі жандана түсетіндігіне сенім білдірді.

Валентина ҚОЗЫБАҚОВА