Ел шебін күзету-ерекше міндет (ФОТО)

Қазақстан Республикасы Ұлттық қауіпсіздік комитеті шекара қызметінің құрылғанына биыл-25 жыл. Отанымыздың Батыс аймағындағы мемлекеттік шекараны күзететін маңғыстаулық шекарашылар ширек ғасырлық мерекесін кең көлемде атап өтті.

Теңіз жағалауында ұйымдастырылған мерекелік шараға Қарулы Күштердің әскери бөлімдерінің сарбаздары, мемлекеттік мекемелер мен мемлекеттік органдардың қызметкерлері, ҚР Қарулы Күштерінің ардагерлері, облыстық мәслихаттың депутаттары мен өндірістік мекемелердің өкілдері және жастар ұйымының, ҮЕҰ мен Маңғыстау облыстық Қазақстан халқы Ассамблеясы хатшылығының өкілдері жиылды.

Ресми жиынды құттықтау сөзбен ашқан ҚР ҰҚК Шекара қызметінің «Батыс» өңірлік басқармасының басшысы, полковник Тимур Қайырбеков 1992 жылдың 18 тамызында Елбасы Қазақстан Республикасының Ұлттық Қауіпсіздік Комитетінің құрамында шекара қызметін құрғанынан бері аталған қызметтің ел шебінің қауіпсіздігін қырағылықпен күзетудегі қол жеткізген табыстары мен жетістіктері туралы айта келіп, ҚР ҰҚК Шекара қызметінің «Жағалау күзеті» өңірлік басқармасының бастығы, полковник Әлібек Қаюповқа «Ерлік эстафетасын» салтанатты түрде табыс етті. Полковник Әлібек Қаюпов шекара қызметінің ардагерлеріне ел шебін қорғаудағы адал қызметі мен саланы қалыптастыру ісіне қосқан мол үлестері үшін алғысын білдірді.

ҚР ҰҚК Шекара қызметінің «Жағалау күзеті» өңірлік басқармасының 2018 әскери бөлімінің сарбаздары мемлекеттік шекараны бұзушыларды іздеу, ұстау кезінде қызметтік иттердің көмегін қалай пайдалану керектігін және қоян-қолтық ұрыстың әдіс-тәсілдерін іс жүзінде жоғары шеберлікпен көрсетті. Сонымен қатар мерекелік шара барысында әскери теңіз кемелері мен катерлерінің шеруі ұйымдастырылып, қала тұрғындары мен меймандары, теңіз жағалауында демалушылар көк айдын жүзінде тізіліп сап түзеген әскери кемелерден құралған әдемі көріністің куәсі болды.

Шекара шебіндегі сарбаздарды кәсіби мерекемен аймақ басшысы Ералы Тоғжанов арнайы құттықтап, елдің тұтастығы мен тыныштығын қамтамасыз етудегі жұмыстарына табыс тіледі.

- Өңірімізде ҚР ҰҚК Шекара қызметінің «Батыс» және «Жағалау күзеті» өңірлік басқармасы өз жұмыстарын жоғары деңгейде жүргізуде. Тәуелсіздігіміздің алғашқы күнінен бастап еліміздің тыныштығы мен шекарасының қауіпсіздігін қырағылықпен, жоғары жауапкершілікпен күзетіп келе жатқан шекарашылардың, ардагерлеріміздің өз қызметтерін тәуекелге бел байлай, мінсіз, адалдықпен атқаруы-ерекше құнды. Болашақта қазақстандық патриотизммен рухтанған офицерлеріміз бен қатардағы жауынгерлеріміз ардагерлер салып кеткен сара жолдан таймай, жауапты қызметті лайықты жалғастырады  деген үлкен сенімдеміз, - деген облыс әкімі Ералы Тоғжанов бірқатар шекарашыларды Отан алдындағы әскери борышын мінсіз атқарғаны үшін «ҰҚК Шекара қызметінің құрылғанына 25 жыл» мерейтойлық медалімен және «Алғыс хатпен» марапаттады.

- Мен ҚР ҰҚК Шекара қызметінің «Жағалау күзеті» өңірлік басқармасының құпия бөлімінде аға көмекші болып сегіз жылдан бері жұмыс істеймін. Мамандығым өзіме ұнайды. Жұмысымды өте қатты жақсы көремін. Өмірлік серігімді де осы саладан кездестірдім. Бүгінде екі ұлды тәрбиелеп отырған бақытты отбасымыз... Барлық әріптестерімді төл мерекемен шын жүректен құттықтаймын. Әр отбасына мол бақыт, тәуелсіз еліме құт-береке тілеймін,-дейді Перизат Амантаева.

Теңіз жағалауында өткен мерекелік кеш шекарашы сарбаздардың күшімен дайындалған концертке  ұласты. Концерт барысында көрермендер назарына теңіз әскери сарбаздарының ел шебін қорғаудағы қырағылығын, ерлігін паш ететін, шекарашылардың әскери өмірінен сыр шертетін бейнеролик те көрсетілді.

Венера МИРЛАН Суреттерді түсірген Серік МАЙЕМЕРОВ

[gallery td_select_gallery_slide="slide" ids="30769,30770,30771,30773,30772,30779,30774,30775,30777,30781,30778,30780"]