©
Ақтау – тарихи қала. Еліміздегі өзге қалалардан теңіз айлағының болуымен ерекшеленеді. Басқа аймақтағылар мұндағы тұрғындарды ең табысты жандар деп есептейді. Бұлай ойлауға да негіз бар. Өйткені елдің байлығын игерудегі маңдай тердің, табандылықтың, жан кешті еңбектің өтеуі де соған лайық болмақ.
Біз бүгін Ақтаудың ерекшеліктерін ұсынуды жөндік. Портты қалаға саяхаттап келушілер үшін де қажеті болар...
*Мұнда кез келген адамға жұмыс табылады. Тек мұнай-газ саласында біліміңіз болса болғаны. Әзірге КБТУ-дың бұрынғы түлектері мен жергілікті оқу орындарын тәмамдағандар қара алтын әлеміне жолдама алып келеді.
*Теңіз. Бұл қазақстандықтардың біразына әлі де құпиясы ашылмаған дүние. Олар даланың жұпарымен демалса, ақтаулықтар теңіз ауасымен тыныстайды. Мұнда тұрғындар ауа өте ылғал деп шағымданады. Дегенмен сол ылғалды ауа адам терісіне пайдалы екен. Жастықты сақтауға септігін тигізеді.
*Балық және уылдырық. Ақтауды осы үшін де жақсы көруге болады. Мұнда ет орнына балық асады.
*Арзан такси! 200 теңгеңіз (шеткі аудандарға 300 теңге) болса кез келген орынға жете аласыз. Мұндай арзан әрі тұрақты бағаны өзге қалалардан кездестіре қоймайсыз.
* Ерекше наурыз. Айтулы мейрамды тойлауды бұл өлкедегілер ресми датадан 10 күн бұрын бастап кетеді. 14 наурызда көрісуден басталған мереке айдың аяғына дейін де созылып жатады.
*Қыста аққулар қаланың көркін кіргізеді. Бұдан асқан сұлулық, кербездік болуы мүмкін емес секілді. Романтика!
*Ақтауда көп ұлтты, көп тілді тұрғындарды жиі кездестіресіз. Мұнда жұмыс бабымен, отбасы жағдайымен еліміздің өзге өңірлерінен, шет мемлекеттен азаматтар мен азаматшалар көптеп келеді. Әсіресе, Каспий теңізімен шектесетін мемлекеттерден.
*Соған қарамастан, Ақтауда бәрі мемлекеттік тілде сөйлейді. Жиі кездесетін әзірбайжан, орыс, армян т.б. ұл өкілдері сізбен қазақша тілдесіп, сұрағыңызға қазақша жауап берсе, таң қалмай-ақ қойыңыз.
*Маңғыстауда ұлттық киім «мода»! Қазақстанның сәлт-дәстүрді берік ұстанған өңірлерінің бірі екендігі киімнен де көрініс тауып тұрады. Кез келген мереке, жиын той, бас қосу қазақы нақыштағы киімсіз өтпейді. Келіндердің оюлы камзол мен қос етек көйлектегі образы қандастарымызда ғана емес, өзге ұлт өкілдерін қызықтырып келеді.
*Ақтауда көшенің атын жаттап әлек болмайсыз. Өйткені көше жоқ. Қала жалпы 36 шағын ауданнан тұрады. 1-ден 32-ге дейін есептеледі, қалғандары қосымша аудандар, мысалы, 28 А, 29 А, 31 А т.б.
Ақтау жайлы сіз қандай қызықты ақпарат білесіз? Қаланың сізге ерекше ұнайтын тұсы қандай? Бөлісе отырыңыз!
Теңге БЕКМҰРЗАЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
