Шешімін таппаған салық мәселелері

16 қазан күні ҚР мемлекеттік қызмет істері агенттігінің МО департаментінің басшысы Н.Жанназарова Ақтау қаласының мемлекеттік кірістер басқармасының қызмет көрсету орталығына барып, қызмет алушылар үшін жасалынған жағдайлардың жай күйімен танысу мақсатында, барып қарады, - деп хабарлайды mangystaumedia.kz сайты ҚР Мемлекеттік қызмет істер агенттігінің Маңғыстау облысы бойынша департаментінің баспасөз қызметіне сілтеме жасап. Департамент басшысы Мемлекеттік кірістер басқармасының ғимаратындағы халықпен тілдесіп, қызмет көрсету сапасына қатысты ой-пікірлерін тыңдады. Нәтижесінде, мемлекеттік кірістер басқармасының қызмет көрсету орталығының қызметіне оның ішінде салық мәселелері бойынша мемлекеттік органның қызметіне қатысты келушілердің басым көпшілігінің наразылығы тым жоғары екендігі байқалды. Мысалы азаматша Ш.Құдайбергенова өзінің атында ешқандай жылжымалы не жылжымайтын мүлігі болмағандығына және салыққа берешегі болу мүмкін еместігіне  қарамастан, өзге адамның жеке сәйкестендіру нөмірі көрсетілген берешек туралы хабарлама келіп түскендігін жеткізді. Аталған мән-жайды анықтау немесе телефон арқылы ақпарат алу мүмкін емес, тек Ақтау қалалық мемлекеттік кірістер басқармасына келіп жүгіну арқылы білетіндігін айтты. Ал, азаматша Байбозова атында тіркелген мүлік жоқ бола тұра,  өзіне келіп түскен өзге адамның ЖСН (ИИН) көрсетілген салық берешегі жөніндегі хабарламаға  ренішін айтып отыр. Сондай-ақ, бұл азаматтардың мемлекеттік кірістер органдарының тарапынан негізсіз салық берешегі қойылғандығына қарамастан, электронды кезек күту талондарын алған сәттен 1 сағаттан астам уақыт күткендеріне де наразылықтарын жеткізді. Келесі азаматша Л.Зайцева осыдан бірнеше уақыт бұрын дара кәсіпкерлікті тоқтату туралы өтініммен жүгініп, мемлекеттік кірістер органы қызметкерінің тарапынан өтінімі қанағаттандырылып, дара кәсіпкерлігі тоқтатылды делінгенімен, 10 күннен кейін өзге қызметкерден ақпарат сұрау барысында кәсіпкерлік қызмет тоқтатылмағандығы анықталған. Бұдан кейін аталған азаматша қайта мәселені көтергеннен кейін 2022 жылға дейін дара кәсіпкерлігіңіз тоқтатылды деп мәлімдеген. Алайда, қызметі 2022 жылға дейін тоқтатылып тұрған дара кәсіпкерге бүгінгі күні әлеуметтік салық  бойынша берешегіңіз бар деп хабарлама келгендігіне байланысты наразылығын білдірді. Тағы бір азамат 1 топтағы мүгедектің көмекшісі ретінде келіп тұрғандығын, осыған дейін 1 топтағы мүгедек адамға 187 мың теңге салық салуы заңдылығына қатысты сұрағымен жүгінді. Сондай-ақ қарау барысында, орталықта орналастырылған ақпараттар, өтінім бланкілерінің үлгілерінің барлығы тек орыс тілінде болғандығы, арыз-шағым қабылдаушы кеңсе қызметкерінің адамдар жүгінген кездегі аты-жөні жазылған бейджигінің болмауы сияқты кемшіліктер сынға алынды. Осыған байланысты, департамент басшысының тарапынан мемлекеттік кірістер департаментінің басшылығына сын-ескертпелер мен ұсыныстар аталды. Атап айтқанда, бұрын департаментпен жолданып орналасқан көрнекті жерлердегі «Цифрлық агент» мобильді қосымшасы, қызмет көрсету сапасын шағымдану құқықтары мен департаменттің мекен-жәйы туралы ақпараттарды жаңарту, ақпараттар мен үлгі бланкілерінің мемлекеттік тілдегі нұсқасының міндетті түрде болуын қамтамасыз ету, халықтың проблемалық мәселелерін анықтап дер кезінде шешу және ашықтық қағидасын жүргізу мақсатында, бұқаралық ақпарат құралдарына, әлеуметтік желілерге байланысу нөмірлерін, сайттардың сілтемелерін, өзгерістер мен толықтырулар туралы түсіндірмелерді жиі әрі дер кезінде орналастыру, проблемамен келген адамдарға басқарма, департамент басшылығы жеке қабылдаулар жүргізу, жиі-жиі орталықтың қызмет аралап, халықтың ой пікірлерін тыңдап оларға шаралар қабылдау, қажеттілігіне қарай жауапты тұлғалардың тәртіптік жауапкершіліктерін қарау қажеттіктері ұсынылды. Ал, қызмет алушылар үшін қызмет көрсету сапасына қатысты шағымдану үшін арналған аумақтық департаменттің ақпараттары берілді. Сонымен қатар, заңсыз делдалдық қызметтермен айналысуға қатаң тиым салу, ақылы қызметтердің жолын кесу қажеттігі қатаң ескертілді.

Махаббат НҰРЖАНҚЫЗЫ