Күйіп қалған бүлдіршіннің оқиғасына кінәлілер тәртіптік жазаға тартылды

«Nur Otan» партиясы Ақтау қалалық филиалы №43 «Батыр» мемлекеттік балабақшасында орын алған оқиғаға байланысты мән-жайды анықтады, - деп хабарлайды mangystaumedia.kz сайты. Түскі ас мезгілінде балабақшаның № 12 топ тәрбиеленушісі Карина мен түскі ас әкеле жатқан тәрбиешінің көмекшісі А.Бердиева байқаусызда соқтығысқан. Нәтижесінде балабақша тәрбиеленушісі Карина күйіп қалған. Алғашқы көмек дер кезінде көрсетіліп, бүлдіршін облыстық балалар ауруханасына тез арада жедел-жәрдем көлігімен жеткізілген. Ата-анасына да шұғыл хабар беріліп, ауруханада ем-дом шарасы алынған. Қыз 29 пайыз көлемінде термикалық күйік алып, мойны, іші, беті, әсіресе аяғы зардап шеккен. Ақтау қалалық білім бөлімінің қызметтік тексеріс нәтижесінде лауазымды тұлғалар ӘҚБТК-нің әкімшілік құқық бұзушылық бойынша жауапкершілікке тартылған. Балабақша медбикесі, тәрбиеші және оның көмекшісі қызметтерінен босатылған. Күйіп қалған қызға балабақша қызметкерлері тарапынан қаржылай  620 000 мың теңге көлемінде көмек көрсетілген. Емдік дәрі-дәрмектерімен толық қамтамасыз етіліп, Нұр-Сұлтан қаласына барғандағы жол шығындары да өтелген. «Nur Otan» партиясының баспасөз қызметінің мәлімдеуінше, алдағы уақытта да бала денсаулығының күтіміне қолдау көрсетіледі.