Маңғыстаулықтар өңірдің бас полицейіне қандай сұрақ қойды?

Маңғыстау облыстық Полиция департаментінің басшысы Қанат Таймерденов халыққа есеп беру кездесуін өткізді. Оның баяндамасын тыңдаған соң жиналған жұртшылық өз сұрақтарын қойып, жауап алды. Есеп беруде Маңғыстаудың бас полицейіне қойылған сұрақтардың бірнешеуін назарларыңызға ұсынамыз.

Сұрақ: «Есімім - Абдулла Ырзаев. Немере інім темір кесетін мекемеде дәнекерлеуші болып жұмыс істейтін. Сонда жарылыс болып, 1 тамыз күні қайтыс болды. Сіздің өзіңізге айтқаныммен ресми түрде жазғаным жоқ. Бірақ ҰҚК басшына, Ақтау қалалық прокуратурасына жазғанбыз. Ешкімнен ешқандай жауап болмады. Інімнің қайтыс болуына себепкер мекеме басшылары көмектесеміз деп уәде береді. Алайда жәрдем де, жауап та жоқ. Артында екі баласы мен жары қалды. Сол келініме онда інімнің қазасына өзін кінәлі етіп көрсеткен актіге қол қойдырмақ. Айтайын дегенім, інімнің отбасына жәрдем керек. Кінәлілер жазасын алуын талап етеміз»

Жауап: Бұл мәселе бойынша қазір ҰҚК Маңғыстау облыстық департаменті тексеру жүргізіп жатыр. Мен ол жағдайды білемін. Жиыннан соң қалып сөйлесуге әзірмін, жазбаша түрде де жауап бере аламыз. Ал жанұясына жәрдем ретінде ақыны тергеу біткен соң сот арқылы өндіріп алуға құқыңыз бар. Сіздің арызыңыз бойынша қорғаныс министрлігіне, барлық құзырлы орындарға сұраныс жіберіп, тексеру жасалған. Арнайы топ жұмыс істеп жатыр.

Сұрақ: Жаңаөзен қаласының тұрғынымын. Қалада бейнебақылау орнатылуы қарасстырылып жатыр ма?

Жауап: «Маңғыстаумұнайгаз» компаниясының тарапынан Жаңаөзенге 277 млн теңгеге 120 бейнебақылау құрылғысы келер жылдың алғашқы тоқсанында қойылады. Алдын-ала келісімі бар. Қазір осы жұмыстарды бастап кеттік.

Сұрақ: «Мен Мұнайлы ауданы, Басқұдық елді мекенінің тұрғынымын. Бүгін сіздерге алғыс айту үшін келдім. 2018 жылы 18 қаңтарда балама қастандық жасалып, балам аман-есен қалды. Сол істі тергеуде адал еңбек еткен тергеушіге, қалалық ІІБ басшысына мол алғыс айтамын. Сол кісілерге алдымыздағы мереке наградалар берулеріңізді сұраймын.

Жауап: Ниетіңізге рақмет. Дегенмен мемлекеттік наградалар министрлік тарапынан шешіледі. Айтып отырғаныңыз күнделікті полиция қызметкерлерінің міндеті. Сіз айтқан мамандарды анықтаймыз, ұсынысыңызды қарастырамыз.

Сұрақ: Қызылтөбе-2 ауылының тұрығын – Төребайұлы Сәрсенбаймын. Жаңаөзенге баратын жолда 17-постта бағдаршам бар еді. Қазір жоқ, кешке және таңертең сол тұстан өту қиындап кетті. Қанша уақыт күтуге тура келеді, апат та жиі болады. Осыған шара қолдансаңыз.

Бұл сауалға Қанат Даниярұлы 2 күн ішінде анықтап, жауап берілетінін жеткізді.

Сұрақ: Мен Қарақия ауданының тұрғынымын, ауыл шаруашылығымен айналысамын. «Жаңбыршы» шаруақожалығының басшысы – Жалмұрат Төлеген. Маңғыстауда көкөніс өсірумен айналысу тың, мұндағы халықтың қанында жоқ дүние. Жергілікті халықты пайдалану қиынға түсіп отыр. Сондықтан жақын шетелден жұмысшылар алатын едік. Осы жұмысшылардың санын көбейтуге мүмкіндік жасай аласыз ба?

Жауап: 1 желтоқсан күні 22 шағынауданда көшіп-қону орталығы ашылады. 5 мемлекетпен шектесетіндіктен, өңірімізге шетелдіктер жиі келеді. ҚР заңына сәйкес әрбір азамат 5 адамды есепке қойып, қаржысын төлеп, жалдама ретінде алуға мүмкіншілігі бар. Сондықтан балаларыңыз, туысатырыңыздың атына осылай 5 адамнан тіркеуіңізге болады.

Түпқараған аудандық Ардагерлер кеңесі төрағасы Ақшұқырдан, Мұнайлыдан учаскелік полиция бөлімін ашуды сұрады. Қанат Даниярұлы Жақын арада аталмыш елді мекендерден учаскелік полиция бөлімшелерін ашуды жопарлап отырғандарын айтты.

Сондай-ақ Маңғыстау ауданынан зейнеткер Шетпе-Бейнеу арасындағы жол қауіпсіздігін сақтау мақсатында мал өтетін тұстарға белгі қою, малға белгі тағу, бақылау құралдарын көбірек қолдану, қадағалау туралы ұсыныс айтты.

Жауап: Осыған байланысты 1 апта бұрын акция басталды. Қарақия ауданында жол апаты болып, түйеге соғу салдарынан болған оқиғадан бір азамат көз жұмды. Сондықтан қазір малға жарықшағылысқыш белгілер тағу басталып кетті. Қаңтар айының аяғына дейін бәрін қамтимыз деп жоспарлап отырмыз.

Сұрақ: 14 шағын ауданда «Нейрон» емханасының жанында айналмалы жол бар. Сол жерде ешқандай жол белгісі жоқ, осыны қарастырсаңыз.

Жауап: Біз алдымен ол жерді барып, қарауымыз қажет. Анықтаған соң нақты жауабын береміз.

Кездесу барысында уақыт тығыздығына байланысты қойылып сауалдарға жазбаша түрде жауап жолданатын болады.

Теңге БЕКМҰРЗАЕВА

Суретті түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.