Мемқызметшілер балалар ауылының тәрбиеленушілерін Наурыз мейрамымен құттықтады

ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Маңғыстау облыстық департаменті, Сыбайлас жемқорлыққа қарсы іс-қимыл ұлттық бюросының облыстық департаменті, ҚР Президенті жанындағы мемлекеттік басқару академиясының Маңғыстау облыстық филиалы бірлесіп облыстық отбасы үлгісіндегі балалар ауылының тәрбиеленушілерін Наурыз мерекесімен құттықтап, сый-сияпат жасады. Аталмыш шараға Арнайы мониторингтік топ, Әдеп жөніндегі кеңес мүшелері және БАҚ өкілдері қатысты. Наурыз мейрамы қарсаңында ұйымшылдық таныта білген топ балалармен көрісіп, Амал мерекесімен құттықтады. «Қандай қиын заман болсын, қазақ әуелден-ақ жетімін жылатпаған халық. Қазақта «Жетім жерде жыласа, көкте періште күңіренеді» деген қанатты сөз бар. Тағдырдың жазғаны болар, бірақ бұл балалар «ата-анадан күтпеген қамқорлықты кімнен күтеді?» деген сұрақ кім-кімді де ойландыруы тиіс. Бұл балалардың барлығы жетім емес, бірақ жағдайы жоқ болғасын өз балаларынан бас тартқан ата-аналар бар, мүмкіндігінше соларға қол ұшын беруге дайын болсақ. Кім біледі, мүмкін осы балалардың ішінен болашақта министр, ел басқаратын әкім шығатын шығар, біз осыған тілекші болуымыз керек», - деді өз сөзінде агенттіктің аумақтық департаментінің басшысы Нұргүл Жанназарова. «Облыстық отбасылық үлгідегі балалар ауылы» мемлекеттік мекемесінің негізгі міндеттеріне жетім, тастанды, ата-анасының қамқорлығынсыз қалған балаларды отбасылық өмірге жақын бағып-күту, тәрбиелеу және еліміздің жан-жақты дамыған жеке тұлғасын қалыптастыру, әлеуметтік қоғамға бейімдеу жатады. Әсіресе балаларды отбасы жағдайында дербес өмірге тәрбиелеу, оқыту, сауықтыру және рухани дамуына мамандар күш салады. Олардың әлеуметтік қорғалуын, оңалуын, денсаулығын, құқықтары мен мүдделерін қорғау – басты міндет. Айта кету керек, отбасы үлгісіндегі балалар ауылының тәрбиеленушілері жан-жақты, мәдени шараларға белсенді қатысады, оқу озаттары аз емес, түрлі олимпиадаларға қатысып жүлделі орындарға ие болып жүргендері де бар. Балалар үйінің тәрбиеленушілері өз өнерлерін ортаға салды. Мемлекеттік қызметшілер мен қоғам өкілдері олармен естелікке суретке түсіп, қызықты әңгіме дүкен құрды. Балаларға жүрекжарды тілектерін айтып, сый-сияпат жасады. Сондай-ақ арқан тарту, қазақша күрес және гір көтеру сияқты спорттық сайыстар өтіп, жеңімпаздар диплом, медаль, Кубок және қаржылай сертификаттарға ие болды.

Суреттерді түсірген Талант ҚҰСАЙЫН

[gallery td_select_gallery_slide="slide" ids="75142,75141,75140,75139,75138,75137,75136"]