Түпқарағанда тұңғыш рет психологтар конференциясы өтті

Біздің елімізде 10 жылдан аса уақыттан бері, жыл сайын 22-25 желтоқсан аралығында психологтардың кәсіби мерекесі ретінде атаулы күн болып өтіледі. Әлемде жыл сайын Дүниежүзілік Психикалық денсаулық күнін атап өту 1992 жылдан басталған. Бұл мейрамның бастамашысы - Дүниежүзілік Психикалық денсаулық федерациясы. Негізгі мақсат – жалпы жұртшылықтың назарын психикалық денсаулық проблемаларына аудару еді.

Алғаш 2002 жылдан бастап бұл мерекені біздің психологтар ассоциациясы да Психология күні ретінде елімізде атап өтуді ұйғарды. Бұл біздің қоғамымыздағы психология саласына артып келе жатқа сенім мен оның рөлін және өмірдің көптеген салаларына тигізер оң маңызды әсерін көрсетеді.

Жақында Психологтар күніне орай Түпқараған аудандық Білім беру бөлімінің ұйымдастыруымен Есбол Өмірбаев атындағы орта мектепте «Психологиялық зерттеулер мен тәжірибедегі инновациялық технологоиялар» тақырыбында ауданда алғаш рет аудан психологтарына арналған конференция ұйымдастырылды.

Аудандық конференцияға аудан бойынша балабақшадан 16 психолог, мектептерден 18 психолог мамандары мен арнайы шақыртылған қонақтар қатысты. Конференция аясында Түпқараған ауданы білім бөліміне қарасты мектепке дейінгі және орта білім беру мекемелеріндегі психологтар туралы Назерке Көкебаева баяндама жасап, конференцияда «Ата-ана мен мұғалімге психологиялық көмек болашақтың іргетасын мықты етеді», «АІІБ-де тіркеуде тұрған отбасылармен және балаларымен жүргізілген психологиялық жұмыстар туралы», «Мектептердегі кәмелетке толмағандар арасында деструктивті мінез-құлықтың алдын алу жұмыстары», «Балабақша психологының жұмысы» тақырыптарында аудан психологтары сөз алды.

Конференцияның практикалық бөлімінде «Отбасы – татулықтың ұясы» тақырыбында Ақшұқыр мектеп-лицейінің педагог-психологы Қымбат Тұрабаева, «Сенімділік күш береді» тақырыбында психологиялық тренингті Шахта орта мектебінің педагог-психологы Айболат Баян жүргізіп, қатысушыларды бір серпілтті. Конференция аясында «Жантану әлеміне саяхат» тақырыбында кітап көрмесі қойылған. Онда 40-қа жуық салаға қатысты ғылыми зерттеу еңбектер мен мотивациялық кітаптар ұсынылды.

Аудандық білім беру бөлімінің басшысы Айбаршын Өтесбаева барша психологтарға санаттарын көтеру мен біліктіліктерін арттыру сияқты нақты тапсырмалар берді:

- Психологтардың қатысуынсыз көптеген әлеуметтік мәселелерді шешу мүмкін емес. Бұл тұжырымды бүгінде барша ғылым, адамзат мойындап отыр. Соңғы жылдары психология саласы даму үстінде. Әсіресе, мектеп пен балабақшадағы психолог мамандардың жұмысының маңызы артып, жауапкершіліктер жүгі артуда.

Психологтардың жұмысы біздің заманауи өмірімізде эмоциялар мен кернеулерге толы өте маңызды қызметтің түрі. Біле білгенге психикалық денсаулықтың маңызы - физикалық саулықтан кем емес, - деп психологтар жұмысының жауапкершілігін түсіндірді.

Сонымен қатар, мерекеге орай, аудандағы бірнеше психологқа аудан әкімі және аудандық білім бөлімі басшысы атынан Алғыстар табысталды. Аудан психологтарының қатарына қызметке қосылып жатқан жас мамандарды да мереке аясында аудандық білім беру бөлімінің басшысы ескерусіз қалдырмай, қызметтеріне сәттілік тілей отыра, естелік сыйлықтар табыс етті.

Милана ЕЛЕУСІНОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.