Балаларға қуаныш сыйлады

©

Жаңа жыл қарсаңында облыс әкімі Серікбай Трұмов облыстық отбасылық үлгідегі балалар ауылына барып, бүлдіршіндерді Жаңа жылмен құттықтады. Сондай-ақ шараға аймақ басшысының орынбасары Қаныбек Жұмашев, облыстық мәслихаттың хатшысы Нұри Тумышев, Ақтау қаласының әкімі Ғалымжан Ниязов қатысты.

Серікбай Өтелгенұлы өзін қошеметпен қарсы ал­ған балалармен тілдесіп,жағдайын сұрады. Балалар өз ке­зегінде облыс әкіміне сабақ пен спорттағы үлгерімі жайлы баян­дап, жаңа жылдық өлеңдер айтып берді.

– Балаларға зор денсаулық, та­быс тілеймін, жақсы оқуларына, өз елінің мақтанышы болып ер жетуіне тілектеспін. Өздеріңіздің үнемі мемлекеттің қамқор­лығында болатыныңызды ұмыт­паңыздар, – деп облыс басшысы ізгі тілегін жеткізіп, оларға жаңа жылдық тәттілер табыстады.

Тәрбиеленушілердің бірі, он жеті жасар Татьяна Герасимова – «БИИК» шымкенттік футбол клубының ойыншысы. Күніне екі рет «Мұнайшы» спорт клубында жаттығады, Шымкентке жиі барып тұрады. «Мұнда біздің жағдайымыз жақсы, барлығы жеткілікті, мектепке барамыз. Бізге көп адам қонаққа келеді, сыйлықтар тарту етеді. Мы­салы, Жаңа жылға орай маған кроссовка мен жейде сыйлады. Маңғыстаулықтарға табыс пен сәттілік тілеймін. Салауатты өмір салтын ұстаныңыздар, спортпен айналысыңыздар, – дейді жас спортшы.

Отбасылық үлгідегі балалар ауылының директоры Орынба­сар Наурызбаевтың айтуынша, ауылда 34 бала тәрбиеленуде, ең үлкені 17 жаста, ал ең кішісі төрт жаста. Балалар үйде тұрақты тұрып жатыр.

– Ауыл Сара Назарбаеваның тұжырымдамасына сай құрылған. Біздің үй ата­-ана қамқорлығынсыз қалған балаларға арналған. Олар барлық қажеттілікпен қамтамасыз етілген. Қазіргі таңда тоғыз бала студент, үшеуі Нұр­-Сұлтанда, алтауы жергілікті колледждерде оқып жатыр. Қалған оқушылар қазақ және орыс мектептеріне барады. Оған қоса барлық бала үйірмелер мен спорт секцияла­рына қатысады. Біздің мемлекет аз қамтылған топтан шыққан жандарға әрдайым қамқорлық танытады. Біздің балалар тек мей­рамдарда ғана емес, жай күндері де қоғамның назарында, – деді О.Наурызбаев.

Айта кетерлігі, қайырымдылық шарасы біткеннен соң ауылға көші­-қон қызметінің өкілдері ке­ліп, балаларға сыйлықтар тарту етті, олармен әңгімелесіп, хал­дерін сұрады.

Арай ЖАУПЕРОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.