«Ақтау-Форт-Шевченко» тас жолын жарықтандыру жұмыстары жүріп жатыр
[ 2019 ] 6 желтоқсан, 04:53 | Жаңалықтар
«Ақтау-Форт-Шевченко» тас жолын жарықтандыру жұмыстары жүруде, - деп хабарлайды mangystaumedia.kz сайты Түпқараған ауданы әкімдігінің баспасөз қызметіне сілтеме жасап.
«Ақтау-Форт-Шевченко» тас жолының 13,5 шақырымынан бастап 28 шақырымына дейінгі автожолды жарықтандыру 2018 жылы басталған болатын. Қазіргі таңда нысанның жоғарғы кернеулі электр желілері тартылып, «КТП» электр құрылғылары, сондай-ақ жол бойындағы жарық бағаналары орнатылуда.
Ақшұқыр ауылы мен Сайын Шапағатов ауылының арасындағы аталған жолдағы автокөлік қарқынының көптігіне (сағатына 450 көлік) байланысты тұрғындардың қауіпсіздігін ескере отырып, жобаға өзгерістер енгізілген. Мәселен, енді жаяу жүргіншілер жолағы түрлі-түсті етіп боялады. Бастапқы жобада қаралған темір бағаналардың орнына заманауи бағаналар орнату жоспарланып отыр. Сондай-ақ, мердігер мекемемен келісім негізінде жарық бағаналарын орнату бұрын Ақшұқыр ауылы 14 шақырымнан басталады деп белгіленген болса, енді 13,5 шақырым тұсынан, яғни «Бегей» тұрғын үй алабы маңынан басталатын болады. Құрылыс жұмыстары жоспарлы жүруде.
Аудандық әкімдік өкілдерінің айтуынша, жарықтандыру жұмыстарын жыл соңына дейін бітіру көзделіп отыр. Жобаға қаражат аудандық бюджеттен бөлінген.
Оқи отырыңыз: Каспий итбалықтарын зерттеу және оңалту орталығы еріктілерді іздейді
2298
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
