Қызылшаның екпесін алған маңғыстаулық бала Астанаға жіберіледі
[ 2019 ] 18 наурыз, 06:37 | Жаңалықтар
Қызылшаға қарсы екпе алған 10 жастағы маңғыстаулық бала ауырып жатыр. Мұнайлы ауданы Бесшоқы (Маңғыстау-5) ауылында тұратын балаға, ата-анасының сөзінше, екпе 29 қаңтар күні салынған, - деп хабарлайды mangystaumedia.kz сайты.
«Баламыз мектептен келген соң басы ауырып тұрғанын айтты. Дәрі ішсе де басылмай, қайта күшейіп кетті. Сондықтан жедел жәрдем шақырдық. Дәрігерлер келгенше ұлымыз есін жоғалтып, тала бастады. Дереу облыстық балалар ауруханасына әкелді, дегенмен әлі беті бері қарар емес. Сол күні бізге ескертусіз балаға қызылшаға қарсы екпе салғанын білдік. Бәрі содан басталды», - деген жақындары inaktau.kz сайтына берген сұқбатында.
Алдымен облыстық балалар инфекциялық ауруханасына түскен науқастың емі кейін неврология бөлімінде жалғасқан. 6 сағат ЭЭГ (электроэнцефалография) өткізу нәтижесінде невропотологтар «симптомдық эпилепсия» диагнозын қойған. Дегенмен дерті басылмағандықтан ол жақын күндері Астана қаласына жіберілмек. Дәрігерлер нақты қорытындысы шыққанша екпемен байланыстырмауды сұрап отыр.
«Қаңтар айында одан өзге 36 бүлдіршін екпе алды. Бірақ олардан ешқандай шағым түскен жоқ. Бұл жағдай бойынша Қоғамдық денсаулық сақтау департаменті мен Маңғыстау облыстық денсаулық сақтау басқармасы қызметтік тексеріс жүргізді», - дейді МО денсаулық сақтау басқармасы баспасөз қызметі.
Айта кетейік, жыл басынан бері Бесшоқы елдімекенінде бір жылы дүниеге келген 150 бала қызылшаға қарсы егілген. 6 жастан асқан 64 бала қайта екпе қабылдаған.
1470
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
