ДСБ балалар жұқпалы аурулар ауруханасындағы жағдай туралы пікір білдірді

Жақында Ақтау қаласындағы балалар жұқпалы аурулар ауруханасында түсірілген видео әлеуметтік желіде қызу талқыға түскен еді. Ондағы мәселелерге байланысты МО Денсаулық сақтау басқармасының баспасөз қызметі жауап берді. - Кастрюльге келетін болсақ, бөлімшеде тағамды жылытуға тыйым салынады. Ондағы кастрюльдер тек су үшін қолданылады. Жыл басынан бері 6 микротолқынды пеш істен шығып, қазір ақаулы күйде тұр, - деді МО Денсаулық сақтау басқармасының баспасөз қызметінде. Балалар жұқпалы аурулар бөлімшесі облыстық көпбейінді балалар ауруханасына жыл басында қосылған. Жұқпалы аурулар бөлімінде қабылдау бөлмесі мен 60 төсектік стационар жұмыс істейді. Денсаулық сақтау басқармасының ақпаратына сәйкес, қабылдау бөлмесіне күн сайын тәулігіне 100 және одан да көп бала барады. Бүгінгі таңда бөлімшедегі емделушілер саны 84. Оқи отырыңыз: Отпан тауда Қабиболла Сыдиықовтың 85 жылдығы аталып өтті "Бұл балалар ауруханасы облыс бойынша балаларға инфекциялық бейіндегі мамандандырылған медициналық көмек көрсететін жалғыз мамандандырылған мекеме болғандықтан және мұнда келушілердің қарасы көп болғандықтан төсек орындары тапшы", - деді басқармадан. Облыстық көпбейінді балалар ауруханасының жұқпалы аурулар бөлімі 1981 жылы салынған ғимаратта орналасқан. Ол ғимаратқа күрделі жөндеу жұмыстары соңғы рет 2009 жылы жүргізілген.  Денсаулық сақтау басқармасы айтқандай, балалар ауруханасының өз қаражаты есебінен косметикалық жөндеу кезең-кезеңмен жүргізіліп келген. - Күрделі жөндеу жүргізу үшін жобалау-сметалық құжаттама әзірленді, қазір ол мемлекеттік сараптама сатысында, - деді МО Денсаулық сақтау басқармасының баспасөз қызметі. Айта кетейік, жұқпалы аурулар балалар ауруханасына пациент тарапынан шағым түскен. Оның айтуынша, емделушілердің төсек орыны дәлізде орналасқан. Аурухана ас үйіндегі санитарлық жағдайдың да көңіл көншітпейтінін айтқан.

Махаббат НҰРЖАНҚЫЗЫ