Құрық ауылында аяқ киім тігетін шеберхана ашылды

Қарақия ауданы, Құрық ауылында орналасқан «Аishah_ shoes» аяқ киім өндіру шеберханасы ресми түрде ашылу рәсімін жасап, лентасын қиды. Игі шараға Қарақия аудандық кәсіпкерлік және өнеркәсіп бөлімі басшысы Алия Жұмабайқызы, «Атамекен» КП аудандық филиалы мен Құрық ауылы басшылығы және кәсіпкердің ағайын-­туысқандары, әріптестері қатысты. Отандық өнімді қолдай кел­ген көпшілік кәсіпкерді құттықтап, сәттілік тілесе, ақ жаулықты аналар шашу шашып, ақ батасын берді. Естеріңізге сала кетейік, сапалы тері өнімдерінен түрлі аяқ киімдер жасап, көпшілікке ұсына бастаған «Айшах шоес» шеберханасы осыдан бір жарым ай бұрын өз жұмысын бастаған болатын. 2018 жылы «Ersai» компаниясы, «Орталық Азияның Евра­зия Қоры» жобасынан қайтарымсыз грант ұтып алған Айнұр Тоқбаева жаңа кәсіпті өзінің Шайырда тұратын апасы Айгүл Тоқбаевамен бірлесіп, жандандырған. Өңір тұрғындарының қызығушылығын тудырған отбасылық кәсіп өз мүмкіндігін кеңейтіп, Шайыр ауылында да ашылмақ. Қазір шеберхана ер адамдарға арналған қыстық аяқ киімдер топтамасын тігіп, тұтынушыға ұсынып отыр. - Аяқ киімдер сиыр терісінен, ішкі жағы қойдың жүнінен тігілген. Аяқты терлетпейді, ыңғайлы, сапалы. Тапсырыстар қабылданып жатыр, -­ дейді Айнұр Тоқбаева.

Шынар КЕНДІН

Оқи отырыңыз: Мұнайлы ауданында келесі жылы жаңа мектеп қолданысқа беріледі