Алты айда 18 адам АИТВ инфекциясымен тіркелді

  Әлемде емі табылмаған аурулардың бірі—жұқтырылған иммун тапшылығы синдромы (ЖИТС). Оның алдын алу шаралары да толассыз жүріп жатыр. Соған қарамастан АИТВ инфекциясымен тіркелетіндер қатары азаяр емес, жыл сайын арта түсуде.

  ЖИТС-тың алдын алу және оған қарсы күрес жөніндегі облыстық орталықтың эпидемиолог дәрігері А.Кемазанованың хабаралуынша, биылғы 6 айда  облыс  бойынша АИТВ инфекциясымен 18 адам тіркеліп отыр. Олардың   8-і  шетелдік   азаматтар, ал 10-ы ҚР  азаматтары. Салыстырмалы түрде айтсақ, бұл көрсеткіш өткен жылғы осы мерзіммен салыстырғанда 7 адамға артық. 2016 жылдың алғашқы жартысында тіркелгендердің 8-і қазақстандықтар, 3-і шетелдіктер болатын. Бұл көрсеткіш жерлестеріміз арасында АИТВ жұқтырғандардың көбейіп келе жатқанын аңғартады.

  - Тіркелгендерді аумақтарға бөліп қарастырсақ, Ақтау қаласында 77,8%, Мұнайлы ауданында 22,2% екенін көруге болады,-дейді ол.-Сондай-ақ АИТВ жұқпасын көбінесе халықтың қолайлы тобы,  әсіресе жастар көбірек жұқтыруда. Облыс бойынша АИТВ инфекциясына шалдыққандар 20-29 және 30-39 жас аралығындағы жас адамдар.  Жынысына қарай бөлінісіне назар аударсақ, ер адамдар 83,3%, әйелдер 6,7%. Осылайша еркектер мен әйелдердің арақатынасы 5:1. Әлеуметтік-кәсіптік құрамы бойынша талдау АИТВ инфекциясының жұмыс  істейтіндермен қатар жұмыс  істемейтіндер  арасында да  тіркелгенін  көрсетіп отыр. Берілу жолдары бойынша кездейсоқ, таныстығы аз адамдармен серіктес болған кездегі жыныстық гетеросексуалды жолы басым сипатта.

  Анықталған АИТВ инфекциясын тасымалдаушылардың барлығына тестіге дейінгі және  тестіден кейінгі кеңес беру өткізілді. Олардың құқықтары мен міндеттері түсіндірілді,  өздерімен жақын байланыстылар тексеріліп-қаралды. АИТВ инфекциясымен тіркелгендер  анықталғаннан кейін АИТВ жұқтырылған ҚР азаматтары ЖИТСтың алдын алу және оған қарсы күрес жөніндегі орталықта диспансерлік  есепке  алынды.

  Өкінішке қарай, осы  кезге дейін АИТВ-ға қарсы  тиімді  вакцина  ойлап табылған жоқ. Әр адам өз денсаулығына мұқият болуға тиіс. Денсаулық қандай байлықтан да қымбат, өз денсаулығыңызды сақтай біліңіздер.

  Вирусты жұқтырып алмау үшін сақтану шараларын қолданыңыздар. Қанда АИТВ инфекциясының бар-жоғын анықтап, қаралу үшін мына мекен-жайға хабарласуға болады: Ақтау қаласы, 3 ш/а, 170-үй, 2-ші қабат, №201 кабинет. ЖИТС-тың алдын алу және оған қарсы күрес жөніндегі облыстық орталық. Телефон: 50-05-25, 50-40-49. www.antispid.kz.сайты

  Валентина ҚОЗЫБАҚОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.