Өңірде іш ауруы азайып, қызылша «қызып» тұр     

Өңірімізде биылғы 10 айда аса қауіпті және басқа да карантиндік  инфекциялар, іш сүзегі, паратиф, іріңді менингит және вакцинамен сақтандырылатын құрөзек, сіреспе, полиомиелит, қызамық, эпидемиялық  паротит сияқты аурулар тіркелген жоқ. Осы уақыт аралығында қоғамдық тамақтану орындарымен байланысты топтасқан аурулар да кездеспепті. Бұл жөнінде Маңғыстау облысының тауарлар мен көрсетілетін қызметтердің сапасы мен қауіпсіздігін бақылау департаментінде болған баспасөз мәслихатында департамент басшысы Ерғали Сыдыманов айтты. Келтірілген мәліметтерге сенсек, санитарлық-профилактикалық іс-шаралар жоспарлы жүргізілгендіктен жекеленген аурулардың төмендеуі байқалады. Көптеген аурулар көрсеткіштері біршама азайған. Атап айтқанда, бұлар — сальмонеллез-2,4 есеге, бактериальды дизентерия–2,5 есеге, жіті ішек инфекцияларының тобы–1,5 есеге, ротавирус инфекциясы-38,6%, тағам токсико инфекциясы–9,0 есеге, серозды менингит–4 жағдайға, жіті вирусты гепатиттер–7 жағдайға, оның ішінде «А» вирусты гепатит-2 жағдайға, «В» вирусты гепатит–4 жағдайға, «С» вирусты гепатит–1 жағдайға, созылмалы вирусты гепатиттер  4 жағдайға, эхинакоккоз–39,3%, бруцеллез–3 жағдайға, энтеробиоз–4,5%, ЖРВИ–0,48%, мерез-36,9% азайған. Керісінше, менингококк инфекциясы 1 жағдайға, көкжөтел–1 жағдайға, туберкулез 7 жағдайға және тұмау көрсеткіштері 7,5% артқан. Өткен жылғы желтоқсан айынан бері қызылша ауруының  эпидемиологиялық жағдайы тұрақсыз болып отыр. Осы жылғы 10 айда 1137 қызылша ауруы тіркеліп, оның ішінде 887 (72,5%) жағдайы зертханалық, 250 (27,5%) клиникалық түрде нақтыланған. Науқастар санына жастары бойынша талдау жасағанда, ауырғандардың 718-і (63,0%) 14 жасқа дейінгі балалардың үлесіне тиесілі болса, 419 (37,0%) ер адамдар болып отыр. Ал контингент бойынша талдағанада, ауырғандар арасынан ең жоғарғы үлесі  ұйымдаспаған топтардан–515 жағдай (45,3%), жұмыссыздар–163 жағдай (14,4%) тіркелді. Оқи отырыңыз: «Ақтау-Форт-Шевченко» тас жолын жарықтандыру жұмыстары жүріп жатыр - Облыс аумағында биылғы 1 сәуірден  бастап желтоқсан айына дейін 9-10 ай 29 күн аралығындағы балаларды қызылшаға қарсы қосымша иммундау жұмыстары жүргізілді, - деді департамент  басшысы. - Егілетін балалардың жоспары жасақталып, барлығы 15 090 болды. Сәуір-қазан айлары аралығында 13645 бала жоспарланып, оның ішінде екпемен қамтылғаны—10591 бала (77,6%). 2019 жылдың 16 сәуірінен бастап 20-29 жас аралығындағы тұрғындарды қызылша мен қызамыққа қарсы қосымша иммундау жүргізілуде. Облыс бойынша егілуге 66 240 адам жоспарланса, бүгінгі күнге дейін 61 167 адам немесе 93,1% егілді. Бұдан басқа 20 жасқа дейінгі 306 адам, 30 жастан асқан 4248 адам өз еріктерімен қызылшаға және қызамыққа қарсы екпе алды. Ақтау қаласының тауарлар мен көрсетілетін қызметтердің сапасы мен қауіпсіздігін бақылау басқармасының мамандары облыстық жұқпалы аурулар бөлімшелерін 2018-2019 жылдары ерекше тәртіппен екі рет тексерді. Өткен жылы жүргізілген тексеру қорытындысы бойынша құрамында жұқпалы аурулар бөлімшесі бар Маңғыстау облыстық ауруханасы сотқа берілді. Облыстық жұқпалы аурулар ауруханасының қайта ұйымдастырылуына байланысты нысанның қызметін тоқтата тұру мүмкін болмады. Бірақ 4 айыппұл салынды және 1 ұйғарым шығарылды. 2019 жылғы тексеру қорытындысы бойынша 11.11.2019 ж. №75 бұзушылықтарды жою туралы ұйғарым берілді. 30 АЕК көлемінде екі әкімшілік айыппұл салынды. Сонымен қатар биыл жоспардан тыс 3 рет тексеру жүргізілген. Оның біріншісі — ауруханаішілік жұқпалы аурулардың тіркелуі бойынша жоспардан тыс тексерілді. Тексеру нәтижесінде директордың орынбасары М.Бекбаевқа 20 АЕК (50500 тг.) көлемінде әкімшілік жаза қолданылды. Екіншісі тексеру емделушіге берілген түскі аста тарақан бар екендігі туралы шағым бойынша жоспардан тыс жүргізілді. Тексеру нәтижесінде осы мәселе бойынша анықталған ескертулер болмаған. Ал үшіншісінде ауруханаішілік жұқпалы аурулардың тіркелуі бойынша жоспардан тыс тексеріліп, нәтижесінде 04.05.2020 жылға дейінгі мерзімге ұйғарым берілді. Сондай-ақ, Е.Сыдымановтың айтуынша, құрамында инфекциялық бөлімшесі бар облыстық балалар ауруханасы Маңғыстау облысының медициналық ұйымдарының инфрақұрылымын дамытудың 2026 жылға арналған аймақтық перспективті  жоспарының тізіміне енгізілген. Жоспарға сәйкес балалар жұқпалы аурулар бөліміне күрделі жөндеу жүргізу 2020 жылға жоспарланған. Мұндағы барлық бөлмелерде, бокстарында, жартылай бокстарында, ас тарату орындарында, медициналық қалдықтарды уақытша сақтау бөлмесінде және санитарлық тораптарда күрделі жөндеу жұмыстары талап етіледі. Қабырғалардың, төбелерінің сырлары түскен, қабырғаларында  төбеден аққан сары су іздері көрінеді, едендердің линолеум төсеніштері бұзылған, ем-шара және ас тарату орындарында  кафельдері сынған. Кереуеттер, манеждер, кувездер сияқты жиһаздар өте ескі, жарамсыз, ауыстыруды қажет етеді. Жұқпалы аурулардың маусымдық көтерілуі кезінде науқастардың инфекциялық бөлімшелерде шамадан тыс көбеюі де жағдайды күрделендіріп тұр.

  Валентина ҚОЗЫБАҚОВА