Ақтаулық шешен жігіті марапатталды
[ 2019 ] 12 желтоқсан, 12:05 | Жаңалықтар
Тәуелсіздік мерекесі қарсаңында Нұр-Сұлтан қаласында Қазақстан халқы Ассамблеясы ұйымдастырған «Ұлы даланың ұлтаралық тілі» атты республикалық форумы өтті. Форумның ең қызықты кезеңі — марапаттау сәтінде маңғыстаулықтар марқайып қалды. Мұның себебі — форумға Ақтау қаласынан қатысқан шешен жігітінің жоғары марапатқа ие болуы еді.
«Өзге тілдің бәрін біл, өз тіліңді құрметте» деп Қадыр Мырза Әлі айтпақшы, ұлты басқа болғанымен да жүрегі қазақ деп соққан, қазақ тілін өз ана тілімен қатар меңгерген Джамалайл Элимханов Қазақстан халқы Ассамблеясы Жансейіт Түймебаевтың Алғыс хатымен марапатталды.
Тіліміздің мерейін арттыруға өзіндік үлесін қосып жүрген «Вайнах» шешен-ингуш этномәдени бірлестігінің мүшесі, «Емір-Ойл» ЖШС басқарма басшысы, әрдайым қоғамдық жұмыстардың бел ортасында жүретін Д.Элимхановты ортасы жалынды патриот, белсенді азамат ретінде таниды.
Валентина ҚОЗЫБАҚОВА
2935
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
