Өңірге танымал хирург Намаз Ізімбергенов өмірден озды

Медицина ғылымдарының докторы, профессор, ҚР Ұлттық ғылым академиясының академигі, халықаралық хирургтар қауымдастығының мүшесі, Батыс Қазақстанда хирургия мектебінің негізін қалаған тұлға Намаз Ізімбергенов 82 жасында өмірден озды. Атақты ғалым хирургияның жаңа әдістерін енгізудің арқасында мыңдаған қазақстандықтардың өмірі аман қалуына себеп болды. Оның тікелей араласуымен жоғары деңгейгедегі күрделі оталар жасалды. Академик ширек ғасыр Марат Оспанов атындағы Батыс Қазақстан медицина университетінің госпитальдық хирургия кафедрасының жетекшісі болды және шын мәнінде өзінің хирургия мектебін құрды. Көптеген медальдармен марапатталды, оның ішінде Ахмет Байтұрсынов атындағы награда да бар. Профессор 600 жуық ғылыми жұмыстардың авторы, оның ішінде 13 монография, хирургияның өзекті мәселелері бойынша 28 методикалық ұсынымдар болды және көзінің тірісінде 22 патент әзірлеген. Өзінің оқытушылық және тәжірибелік қызметінде 6 ғылым докторы және 28 медицина ғылымдарының кандидатын дайындаған. Академиктің тікелей басшылығымен 1990 жылы Ақтөбеде еліміз бойынша алғашқы шұғыл хирургия және іш пердесінің қабынуы республикалық орталығы өз жұмысын бастаған еді. Бүгінде аталмыш орталық мемлекеттік тапсырыс аясында жұмыс жасап келеді. Ол әйелдердің бала босану кезіндегі өлімін зерттеген, жүкті және босанған әйелдерге хирургиялық араласудың әдістерін ойлап тапқан. 2009 жылы емдеу мекемесінің жанынан босанған әйелдерге хирургиялық көмек көрсету орталығы ашылды. Намаз Ізімбергенов 1937 жылы 25 желтоқсанда Маңғыстау облысы Түпқараған ауданы Ащымұрын-Сарытас ауылында дүниеге келген. Ол елімізде тұңғыш рет озон ерітінділерін ішек бойына, көктамырға құю әдісін тәжірибеге енгізді. «Жыл адамы», «Жылдың денсаулық саласындағы үздік өкілі» және т.б. арнайы халықаралық номинацияларының бірнеше рет жеңімпазы. Академиктің ерен еңбегі ағылшын және американдық биографиялық халықаралық орталықтарының Құрмет белгілерімен белгіленді. Намаз Ізімбергенов есімі медицина әлемінде және қазақстандықтардың есінде біртуар перзенті ретінде сақталып қалары сөзсіз. Маңғыстау облысы денсаулық сақтау басқармасының ұжымы отандық хирургиядағы ерекше тұлғалардың бірі болған жерлесіміз Намаз Ізімбергеновтың қайтыс болуына байланысты марқұмның отбасы мен жақын-туыстарына, әріптестеріне қайғырып көңіл айтады.

МО Денсаулық сақтау басқармасының баспасөз қызметі