Ақтауда дзюдодан "Иса-Досан" жүлдесі үшін халықаралық турнир басталды

Ақтауда «Иса-Досан» жүлдесіне арналған IV ашық республикалық турнир басталды. Маңғыстау ұлт-азаттық көтерілісінің қолбасшылары, халық батырларына арналған жарысқа 2002-2003 және 2005-2006 жылы туылған ұл-қыздар қатысып жатыр. Республиканың әр өңірінен 600-ге жуық спортшы келді. Турнирдің ашылу рәсіміне МО әкімінің орынбасары Руслан Сакеев, МО Дзюдо федерациясының президенті Асылбек Жолдыбаев, МО Самбо федерациясының президенті Айдос Ақжанов, Досан батыр ұрпағы, МО құрметті құрылысшысы Асқар Керелбаев және бірнеше қоғам белсенділері қатысты. Сондай-ақ ҚР Дзюдо федерациясының рефери директоры, төрешілер алқасының төрағасы Мухсин Нұртазин арнайы келіп, бас төрешілік атқарды. «Біз өңірлердегі төрешілерді іріктеп, республикалық жарыстарға шақырамыз. Республикалық федерациядан сондай жұмыс бабымен келіп отырмын. Дзюдо – күрестің өте дамыған түрі. Халықаралық дәрежеге сай болу үшін, сол деңгейден түспеу үшін мұндай жарыстар жиі өтуі қажет. Турнирлер болмаса, балаларымыз өспей қалады. Сонымен қатар жарыстардың белгілі тұлғалардың жүлдесіне арналуы қатысушыларды шыңдап қана қоймай, өткенді, түп-тамырын ұмытпауына да ықпал етеді», - дейді Мухсин Нұртазин. Ашылу рәсімінде дәстүрлі түрде өтетін «Иса-Досан» жүлдесіне арналған республикалық турнирге өз үлестерін қосып жүрген азаматтарға марапат табысталды. «Жарысқа Иса, Досан батырларымыздың ұрпақтары, Маңғыстау облыстық дзюдо федерациясы, спорт басқармасы, мектептер бірігіп ұйымдастырып жатырмыз. Турнир жүлдегерлерінің барлығы спорт шеберлігіне үміткер атанады. Алдағы уақытта Маңғыстау облысында мамыр айында Ер Қосай жүлдесіне арналған ХІ, Ақтау Open, Тұрар Жолдыбаев атындағы олимпиадалық ұпай берілетін халықаралық жарыстар өткізу жоспарланып отыр», - дейді «Жас батыр» спорт мектебінің басшысы Манарбек Бисекенов. Жарыс 3 күнге созылады. Қатысушыларға сәттілік тілейміз!

Теңге БЕКМҰРЗАЕВА Суреттерді түсірген Ақерке ГАГАРИНҚЫЗЫ

[gallery td_select_gallery_slide="slide" td_gallery_title_input="«Иса-Досан» халықаралық турнирі" ids="75365,75366,75367,75368,75369,75360,75363"]