Маңғыстаулық дзюдошылар республикалық турнирде 13 алтын алды

Ақтауда халық батырлары – Иса, Досан жүлдесіне арналған республикалық турнир өз мәресіне жетті. Осымен 4-рет өткізілген сайысқа еліміздің түкпір-түкпірінен 600-ге жуық спортшы келді. 2002-2003 және 2005-2006 жж. дүниеге келген жасөспірім ұл-қыздар екі күн бойы бақ сынасты. Сайыс Маңғыстау облыстық спорт басқармасы, МО Дзюдо Федерациясы және «Жас батыр» спорт мектебінің ұйымдастыруымен өтті. Турнир нәтижесінде Маңғыстау облысы дзюдошылары топ жарды. Олар 13 алтын, 14 күміс, 33 қола еншіледі. Ал екінші орын 7 алтын, 4 күміс, 7 қола алған Қызылорда құрамасына бұйырды. 5 алтын, 4 күміс, 9 қола қанжығалаған Атырау облысы үштікті қорытындылады. 2002-2003 жж. туылған жасөспірімдер арасынан Нұрсұлтан Жұбатқан (50 келі), Мұхаммед Құсаев (66 келі), Жолдас Қартбай (81 келі), Салауат Тоқсанов (+81 келі), Маржан Қаналиева (63 келі), Теңелбаева Маржан (+63 келі), Мерейлім Кеңесбек (44 келі), Айкүн Рахметова (52 келі), Камшат Шүкірбек (+57 келі) облыс қоржынына алтын жүлде салды. Ал 2005-2006 жж. дүниеге келген спортшылардан Ғизат Бектұрғанов (38 келі), Абылай Сұлтанбек (55 келі), Мерей Закарина (32 келі), Әсел Жақсылық (36 келі) жеңімпаз атанды. Айта кетейік, турнир жүлдегерлерінің барлығы спорт шеберлігіне үміткер атағын иеленді. Ал қатысушылар үшін «Жас батыр» спорт мектебінде оқу-жаттығу жиындары өтеді. Маңғыстау облысында мамыр айында Ер Қосай жүлдесіне арналған ХІ, Ақтау Open, Тұрар Жолдыбаев атындағы олимпиадалық ұпай берілетін халықаралық жарыстар өткізу жоспарланған.

Теңге БЕКМҰРЗАЕВА Суреттерді "Жас батыр" спорт мектебі ұсынды

[gallery td_select_gallery_slide="slide" td_gallery_title_input="Иса, Досан республикалық турнир" ids="75559,75561,75562,75565,75563,75564"]