Халқының алғысына бөленген елбасы

©

Сайын КЕРЕЛБАЕВ, Маңғыстау облысының құрметті азаматы, Қазақстан Республикасының еңбек сіңірген дәрігері Қазіргі Қазақстан мемлекетінің негізін қалаушысы Нұрсұлтан Әбішұлы Назарбаевқа шынайы алғысымды білдіргім келеді. Елбасымыздың арқасында дүниежүзілік қоғамдастықтың игілігіне айналған Отанымыздың жетістіктері мен табыстары зор болды! Нұрсұлтан Әбішұлы Назарбаев – әлемнің қазіргі тарихындағы кемеңгер тұлға. Елбасы жер-жаһанға мемлекеттің бейбіт және ядролық қарусыз саясатын паш етіп, Қазақстанның абырой-беделін халықаралық жоғары деңгейге шығарды. Оның бастамасымен тәуелсіздік жылдарында экономикалық, саяси, әлеуметтік реформалар сәтті жүзеге асырылды. Нұрсұлтан Назарбаевтың стратегиялық бастамалары, болашақты болжай білетін көрегенділігі, сарабдал саясаткерлігі арқасында көп ұлтты мемлекетіміз дамудың даңғыл жолына түсті. Қазақстан тұғыры биік, тегеуріні мықты мемлекетке айналды. Ұлт көшбасшысы – Елбасының өз еркімен Мемлекет басшысы өкілеттігін тапсыру туралы шешімі де көреген тұлғаның шешімі деп есептеймін. Мұны Нұрсұлтан Назарбаевтың феномені деп айтуға болады. Елбасына және отбасына амандық-саулық, құт-береке, абырой тілеймін. Елге жасаған жақсылық, халыққа жасаған қайырымыңыз әрқашанда алдыңыздан шыға бергей!

* * *

Қайролла ЕРЕЖЕПОВ, қоғам қайраткері ҚР Тұңғыш Президенті Нұрсұлтан На­зарбаевтың кешегі Қазақстан халқына жасаған үндеуі – тарихи оқиға. КСРО құрамындағы көп одақтас республиканың бірін бүгінгідей дербес тәуелсіз елге айналдыру оңай шаруа емес екені белгілі. Ол сол күйзелісті кезең ауыртпалығының барлығын бастан өткерді, қиыншылықтарды жеңді, елді сеніммен кемел келешекке бастады. Қазір Қазақстан өркениет көшіне ілескен қуатты елге, халықаралық деңгейде беделді мемлекетке айналды. Елбасының еңбегі зор. Бұл – кісі барлық күш-қайратын, ақыл-ойын сарқып аянбай қызмет жасады. Уақыт өз дегенін жасайды, бұл заңды ұбылыс және бұл өзгеріс конституцияға сай болып жатыр. Елбасына алғыстан басқа айтарымыз жоқ.

* * * 

Есберген ІҢІРБАЙҰЛЫ, партия ардагері Елбасының қабылдаған шешімі – тарихи маңызы зор шешім. Ол – мемлекет тағдырымен байланысты аса жауапты міндетті қиын кезеңдерде ойдағыдай орындаған көреген көшбасшы, әлемге танымал тұлға. Нұрсұлтан Назарбаев өз үндеуінде тәуелсіз қазақ елінің жаңа кезеңге қадам басқан кезінде жас буын өкілдері де ел басқарып, елді одан әрмен қарай дамытуға үлесін қосады деген нық сенімін айтты. Елбасының біздің тәуелсіз Қазақстан елінің тарихында орны айрықша екендігі сөзсіз шындық. Н.Ә.Назарбаев соңғы 30 жылда билік басында бола отырып қазақ елін өте қиын, ауыр кезеңдерден алып шықты, қазіргідей кемелденген күнге жеткізді. Оған халқымыздың айтар ризашылығы шексіз.