Маңғыстау жастары ҚР Тұңғыш Президентіне алғысын білдірді

Күні кеше ҚР Тұңғыш Президенті Нұрсұлтан Назарбаев өз өкілеттігін тоқтату жөнінде мәлімдеме жасаған болатын. Ол Қазақстанды 30 жылға жуық уақыт басқарды. Бұл жылдар ішінде елеулі өзгерістер мен ел үшін маңызды шешімдер қабылданды. Атап айтсақ, Қазақстан Егемендігін жариялап, Тәуелсіз мемлекет атанды. Өз рәміздерін, ұлттық валютасын бекітті. Ақмола бас қала болып, Астана атауы берілді. Еліміз жаңа белеске қадам басып, «Қазақстан-2030», «Қазақстан-2050» стратегиялық жоспарлары қабылданды. Дүниежүзілік дағдарыс кезеңдерін еңсерді. Әлемдік деңгейдегі саяси, спорттық, мәдени шараларды жоғары деңгейде өткізді. [gallery td_select_gallery_slide="slide" ids="75536,75537,75538"] Осыны ескерген Маңғыстау жастары бүгін Елбасыға алғыстарын айтып, Каспий теңізі жағасында флешмоб ұйымдастырды. Оған тұрғындар, өнерпаздар, студенттер мен оқушылар, этно-мәдени бірлестік өкілдері, БАҚ өкілдері қатысты. Райса Маденова, МО корей этно-мәдени бірлесітігінің төрағасы         «Кеше еліміз үшін елеулі оқиға болды. Елбасы өз қызметін тоқтатарда халыққа, жастарымызға бірнеше жоба, тапсырма жүктеді. Біз оны ақтаймыз деген үміттемін. Республиканы мекен еткен ұлттардың бірлігі мығым, достығы берік болуы – болашағымыздың үлкен кепілі. Ішкі, сыртқы саясатты, экономиканы сақтап қалуда да мұның маңызы зор. Жастардың емін-еркін ер жетуіне, білім алуына, жұмыс істеуіне мол мүмкіндік жасады. Сондықтан Елбасымызға бейбітшілік үшін, бірден-бір Қазақстан халықтары ассамблеясы институтын құрғаны үшін, алаңсыз өмір үшін көп-көп рақмет!» Артем Чигин, жас кәсіпкер «Ақтау қаласында туып, ер жеттім. Қазақстан – менің Отаным. Жасым 23-те. Өзімнің жиһаз жасайтын дүкендерім бар. Елбасының өкілеттігін тоқтатуы, әрине, мен үшін күтпеген жағдай болды. Бірақ бұл күн қашан болса да туары анық еді. Сондықтан Елбасының бұл шешімін түсіністікпен қабылдадым. Оның қолдауымен біз тегін оқуға, шетел аралауға, емделуге мүмкіндік алдық. Ол кісіге тәуелсіз елде еркін өмір сүруге мүмкіндік жасағанына алғысымды айтамын». Гүлсина Мерғалиева, режиссер, ҚР Еңбек сіңірген қайраткері, «Тарлан» сыйлығының иегері «Мен Ресейде туған қазақпын. Нұрсұлтан Назарбаев ел басқарып тұрған кезде Отаныма оралып, жоғары білім алдым. Менің Қазақстандағы саналы ғұмырым Елбасымен байланысты. Біріншіден, тегін білім алдым, түрлі театрда қызмет етіп, қойылымдар қойдым. Елбасының қолы қойылған көптеген марапатқа ие болдым. Ол кісі қатысқан бірнеше ауқымды шарада болдым. Әрине, кешегі мәлімдемесін естігенде көңіл-күйіміз түскені жасырын емес. Дегенмен болашағымыздың жақсы боларына, еліміздің әлі талай биікке шығарына сенемін!». Ғазиза Бақтиярқызы, «Ақ жол жастары» жастар қанатының жетекшісі «Елбасы әркез жастарға деген қолдауын айтып отырады, әр Жолдауынан тыс қалдырмайды. 2019 жылды Жастарға арнады. Біз, қазақ жастары, әрқашан Тәуелсіздіктің тұғырлы болуына, елімізді дамытуға күш саламыз. Біз Елбасымен біргеміз!». Бағдат Қуандық, «Жас Отан» жастар қанаты Маңғыстау облыстық филиалының төрағасы «Елбасының мәлімдемесі, шынына келсек, біз үшін тосын жайт болды. Оған Тәуелсіз Қазақстанның жастары атынан шын жүректен алғысымды білдіремін. 30 жыл бойы еліміз үшін жасаған еңбегі ұшан-теңіз. Әлемде болып жатқан қаншама дағдарысқа қарамастан, еліміз тек қана алға жүрді, дамуын тоқтатпады. Өзім тәуелсіз елде, Нұрсұлтан Назарбаев басқарған мемлекетте өмірге келдім. Енді бізде жаңа эра, жаңа уақыт болады деп ойлаймын. Елбасыға рақмет!»   Әлия Шәріпова, журналист «Еліміз жыл санап даму үстінде. Тұңғыш Президентіміздің оған қосқан үлесі өте зор. Жастар отандық және шетелдік Жоғары оқу орындарында білім алып, кәсібін ашып, елге пайдалы іспен айналысуға мүмкіндік алды. Қазақстандағы тыныштық пен азаттық үшін Елбасыға рақмет!» Құрманәлі Ғазибеков, Маңғыстау облыстық «Ала-ТОО» Қырғыз этно-мәдени бірлестігінің төрағасы «Елбасы кешегі үндеуінде өзі басшылық еткен 30 жылға жуық уақытта қандай кезеңдерден өткенін атап шықты. Елдің қандай қиындықты еңсергенін, бүгінге қалай жеткенін шолып өтті. Қазақстанды бәсекеге қабілетті 30 елдің қатарына қосу жолындағы жоспарларын да баян етті. Әрине, ол кісінің қызметін жалғастыра бергенін қалар едік, дегенмен бұл шешімін қолдаймыз. Ендігі Президент осы жолды жақсы жалғастырып кетсе деген ойдамыз. Жалпы қырғыз халқының, өзімнің атымнан тұңғыш Президентке алғыс айтамын. Ең мықты басшы болды деп ойлаймын!» Ержан Манарбек, «Жастар ресурстық орталығы" жанынан құрылған еріктілер корпусының мүшесі «2019 жылды Елбасы «Жастар жылы» деп жариялады. Бұл – біз үшін, жалпы ел жастары үшін қуанышты жағдай болды. Халыққа жайлы өмір сыйлағаны, Қазақстанды әлемдік деңгейге танытқаны үшін алғысымыз шексіз. Ол кісінің ерен еңбегі халық жадынан өшпейді. Біз үшін Елбасы әрқашан Көшбасшы болып қала береді».

Теңге БЕКМҰРЗАЕВА

https://www.youtube.com/watch?v=uW5wlUCrZ98&feature=youtu.be