Жасөспірім таэвондошылар арасында қалалық чемпионат өтті

Маңғыстау облысы "TaeKwonDo GTF" федерациясының құрылғанына 7 жыл толуына және Тұңғыш Президент күніне  орай жасөспірімдер арасында таэвандодан Ақтау қалалық чемпионат өтті, - деп хабарлайды mangystaumedia.kz сайты. Жарыста үш клубтың спортшылары өзара мықтыларды анықтады. Атап айтқанда Сәттіғұл Әбітов жетекшілік ететін "Өрлеу", Бүркіт Исакұлы бастаған "Taifun" және Бақберген Мұратбаев тізгіндеген "Dragon" клубы. Жарыс «Хъенг» және «Массоги» бағдарламасы бойынша өтті. Барлығы 160 медаль сарапқа салынды. 4-5, 6-7, 8-9, 10-11 және 12-13, 14-15 жас аралығында өткен чемпионат қорытындысы бойынша 40 бірінші, 40 екінші және 80 үшінші орын иегерлері анықталды. Барлық жеңімпаздар мен жүлдегерлер медаль, дипломмен марапатталды. Сонымен қатар, жарыс кезінде «үздік техника» көрсеткен 6 спортшыға арнайы кубок берілді. Олар Асхат Қожабай, Айдын Әбдірашит, Анель Талғатова, Дулат Нұрасыл, Жақсылық Сапарбаев және Алдияр Түркменбай. Чемпионат қорытындысы бойынша облыстың жаңа құрама командасы жасақталып, Орал қаласында өтетін "Батыс Кубогы" республикалық ашық турнирінде бақ сынайтын болады. Алдағы өтетін жарыстарда Маңғыстау командасы медальдің барлығынан үмітті, әсіресе алтыннан. Бапкер өз шәкірттерінің алдағы додада атой салатынына сенімді.  «Бүгінгі жарысымыз жоғары деңгейге ұйымдастырылды деп ойлаймын, себебі жеңіске деген жігері мықты ұлдар мен қыздардың көп екендігі қатты қуантты. Қатысушылар саны 200-ден асып түсті. Ал ал спорттың осы түрімен айналысушылар қатары 500-ден асып жығылады. Бұл тек үш спорт клубы бойынша. Болашақта әр ауданда спорттық үйірмелер ашуды көздейміз. Қазірдің өзінде Жаңаөзен қаласы мен аудандарда сұраныс бар, бірақ тәжірибелі бапкерлер жеткіліксіз болғандықтан бұл сұрақты кейінге қалдырып отырмыз», - дейді федерация президенті. 2020 жылы қаңтар айында Шымкент шаһарында ел біріншілігі өтеді. Сонымен қатар, Нұр-Сұлтан қаласында ашық халықаралық турнир өткізу көзделген. Болгарияның София қаласында жасөспірімдер, жастар және ардагерлер арасында өтетін Әлем чемпионаты негізі сын болмақ. Федерация президенті Сәттіғұл Әбітовтың айтуынша, балғын таэквондошылар кез-келген байрақты додада Маңғыстаудың намысын қорғауға сақадай сай дайын. Оқу-жаттығу жиындары «Өркен» және «Өрлеу» оқу орталығы мен №8 орта мектепте өтеді. Жерлестеріміз өздерінің спорттық шеберліктерін шыңдауға қазірден кірісіп кетті. Осы уақыт аралығында шешімін таппай келе жатқан проблема бар. Атап айтқанда қаражат тапшылығы спортшыларға биік шыңдарды бағындыруға қолбайлау болып отыр. Әзірге спортшылар жарыстарға өз қаржысымен барып жүр. Бұл ретте федерация жанынан құрылған ата-аналар комитеті қаржы мәселесін өз мойынына алған. Балғын таэквондошылар қалтасы қалың жомарт жандардан қолдау күтетіндерін жасырмайды. Демеушілер табылса әлемдік ареналарда көк туымыз биіктен желбіреп, әнұранымыз талай шырқалары сөзсіз. [gallery td_select_gallery_slide="slide" ids="89197,89198"]