«Маңғыстау-Медиа» журналисі «Жаңаөзен қаласының құрметті азаматы» атанды

Маңғыстау облысының, Жаңаөзен қаласының әлеуметтік  дамуына үлес қосқан журналистер - Жаңаөзен қаласының құрметті азаматтары Асылбек Айдаров, Закария Исағұлов, Жоламан Айдарбаевтардың қатарын бүгін журналист Мұратбай Ұлықпан толықтырды. Мұратбай Әбілханұлы Ұлықпан 1958 жылы 24 наурызда Қарақалпақстан АССР-ы Шымбай қаласында дүниеге келген. Ұлты - қазақ. Білімі – жоғары. 1979-1984 жылдары еңбектен қол үзбей жүріп С.М.Киров (қазіргі Әл-Фараби) атындағы Қазақ мемлекеттік университетін бітірген, мамандығы - журналист. Мұратбай Ұлықпан қалалық қоғамдық-саяси «Жаңаөзен», «Маңғыстау» облыстық газеттерінде қызмет етіп келеді. Осы жылдар аралығында бөлім меңгерушісі, редактор, тілші қызметтерін атқарды. Шығармашылық қызметте публицист-журналистке тән қоғам өмірі үшін маңызды мәселерді қозғап, ел хабаршысы, сыншы, нағыз ақпараттың ақ мылтығы екенін дәлелдеді. Ол өзінің кемелденуі жолында ғана емес, журналистикаға қадам басқан жастардың да өсіп-өнуіне, мақала жазу, ақпарат жинау, журналшыға тән мінезділік секілді ең маңызды қағидаларымен бөлісіп отырады. Сондай-ақ, журналистиканың қазіргі таңда ұмыт болып бара жатқан талдамалық және көркем-әдеби (очерк, фельетон т.б.) жанрларында үнемі қалам тербеп отырады. Бар жан-тәнімен мамандығына берілген М.Ұлықпанның қаламының ұшқырлығы, ойының тереңдігі, мақала беруінің ерекшілігі, сынилығы, өзектілігі арқасында қалалық, облыстық, республикалық басылымдарда мақалалары үзбей жарияланып отырады.  Сонымен бірге ақындық қырымен танылған қаламгердің сазы жазылған бірнеше өлеңдері бар. Солардың бірі «Жаңаөзен» әні мұнайлы қала туралы жазылған  көрнекті шығармалардың қатарында. Осы үшін де әртүрлі деңгейдегі марапаттар табысталып, құрмет көрсетіліп отырады. Нақтырақ айтсақ, 33–ке жуық марапаты бар. Өткен жылы қаланың «Жыл Адамы-2017» атанды. Оған қоса, публицистикалық және шежірелік 14 кітаптың авторы. Қазақстан, Өзбекстан Журналистер Одағының мүшесі. Қазақстанның Құрметті Журналисі.