Құрық порты жыл басынан бері 1,2 млн тоннадан астам жүк тасымалдаған
[ 2019 ] 13 желтоқсан, 10:18 | Жаңалықтар
Бұл туралы Құрық портының клиенттерге қызмет көрсету орталығының басшысы Руслан Тайманов аймақ тілшілерімен өткен баспасөз турында айтты, - деп хабарлайды mangystaumedia.kz сайты.
Биылғы жылдың 11 айының қорытындысы бойынша экспортқа 470 мың тонна жүк жөнелтілген. Ал өткен жылда Құрық порты арқылы 1,5 млн тонна жүк тасымалдаған. Түбектегі теңіз порты негізінен мұнай өнімдері, астық, химикаттар және минералды өнімдерді экспорттайды. Сондай-ақ, елге азық-түлік өнімдері мен машина жабдықтары осы портпен жеткізіледі.
Мұнда теміржол және автомобильді айлақ бір мезетте 2 паромды қабылдауға қауқарлы. Өткізу қабілеті 4,1 млн тоннаны құрайтын теміржол айлағы тәулігіне 5 паромға дейін өңдей алады. Ал автомобильді айлақ күніне 3 паром өңдеп, 1,9 млн тоннаға дейін жүк өткізуге қабілетті.
- Біз қазір Әзербайжаннан басқа мемлекеттерден де паром қабылдауға дайынбыз. Алайда кейбір елдердің ішкі жағдайларына байланысты жұмыс басталмай тұр. Қазір Иран елімен келіссөздер жасап жатырмыз. Алдағы уақытта Түркменстан мемлекетімен іскерлік қарым-қатынас орнатуға ниеттіміз. Бүгінде бір бағытта яғни, Бакудегі Алят портымен ғана жұмыс жасап отырмыз, - дейді Руслан Тайманов.
Құрық портының паром кешені заманауи инфрақұрылымдық қондырғылармен жабдықталған. Порттың жобалық қуаттылығы 6 млн тоннаны құрайды. 3 жыл ішінде 1400-ге таман кеме жөндеуден өткен.
- Қазіргі уақытта қазақстандық астық, көмір, мұнай өнімдері, тыңайтқыштар, химиялық заттар Құрық портының паром кешені арқылы экспортталады. Тұтастай алғанда, Құрық портының теміржол және автомобиль инфрақұрылымы арқылы Әзербайжан мен Грузияға, Түркиямен Шығыс Еуропаға жіберуге мүмкіндік бар. Портта паром кешені іске қосылғалы бері кіріс 4 миллиардтан астам теңгені құрады,- дейді Құрық портының бас директоры Серік Ахметов.
Жиын барысында Серік Жетпісбайұлы көліктік хабтың алдағы жоспарлары туралы БАҚ өкілдерімен бөлісті. Мәжіліс соңында бас директор тығыз және тұрақты ынтымақтастық орнатқан 5 компания өкіліне алғыс хат тапсырды.
Айта кетейік, Құрық порты бірінші паромды 2017 жылдың 24 наурызында екінші айлақтан қабылдаған. Ел экономика саласына қосар үлесі маңызды порт үшін бұл күн айтулы дата болып қалары сөзсіз.
Махаббат НҰРЖАНҚЫЗЫ
Суреттерді ӨКҚ ұсынды
1799
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
