Маңғыстаулық каратэшілер 8 жүлдені қанжығалады

Астана қаласында каратэ-додан «Nozawa cup» республикалық турнирі мәресіне жетті. Аталмыш жарыстан Мұнайлы ауданы Маңғыстау ауылының 8 спортшысы топ жарып, облыс мерейін өсірді. Қуанышты жаңалықпен елордадан Мұнайлы ауданы Маңғыстау ауылы балалар мен жасөспірімдер спорт мектебінің бапкері Ерлан Сәрсенов бөлісті.

Байрақты бәсекеге еліміздің барлық аймағынан 6 мен 17 жас аралығындағы 380 каратэшілер қатысып, бақтарын сынады. Олардың арасынан жерлестеріміз Мадияр Баймұрат, Жанғазы Наптал, Бердібек Аныс, Ағабек Орынбек үздік танылып, алтыннан алқа тақты.

- Спорт залға 5 жасымда әкем жетелеп апарды. Бұған дейін аудандық, қалалық, облыстық турнирлерде 1, 2, 3 орындарды еншілеп, бапкерімнің, ата-анамның үмітін ақтадым. Елорда төрінде ұйымдастырылған жарыста 5 кездесу өткізіп, қарсыластырмның барлығын айқын басымдылықпен ұттым. Ақтық сында алматылық каратэшіні 6:4 есебімен жеңіп, алтын медальді қанжығаладым. Осылайша, «Спорт шеберіне үміткер» атағын абыроймен қорғадым. Өте қуаныштымын! Спорттан бөлек, сабағыма да көп көңіл бөлемін. Мектепте үздіктер қатарындамын, - дейді 25 келі салмақта алтын медальді еншілеген Мадияр Баймұрат.

Сондай-ақ, аталмыш жарыстан Айдархан Джамбаев, Жания Оспанова, Диас Реймбай, Ердәулет Ерлан күміс медальдің иесі атанды. Осылайша, аудан қоржыны 4 алтын, 4 күміс медальдармен толықты.

- 19 қараша күні Астанада өткен жарысқа 11 шәкіртімді апардым. Олардың ішінде 8-і жүлделі орындардан көрініп, үмітімді ақтады. Бүгінгі таңда 80 баланы каратэ-доға баулып жүрмін, - дейді Мұнайлы ауданы Маңғыстау ауылы балалар мен жасөспірімдер спорт мектебінің бапкері Ерлан Сәрсенов.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.