Жайдары көңіл сыйлаған Жайдарман

Сәрсенбінің кешінде Есен Елеукен бастаған Жайдарманның жоғары лига командалары Жаңаөзендегі «Мұнайшы» мәдениет үйіне жиналды. Әзіл кеші – Қазақ мұнайының 120 жылдық, Өзен кенорнының 55 жылдық мерейтойы аясында «Өзенмұнайгаз» АҚ ұйымдастыруымен өтті. Мерекелік ойынға «Евразиат» - Нұр-Сұлтан, «Грант» - Орал, «Фемида» - Ақтөбе, «Боранқұл» -Бейнеу және жаңаөзендік «Жалын» мен «Өзенмұнайгаз» құрамалары қатысты. Ойын басталмас бұрын компания бас директорының транспорт және әлеуметтік сұрақтар жөніндегі орынбасары Мақсат Ибағаров пен қала әкімінің орынбасары Аманғали Нұрдәулетов құттықтау сөздерін сөйлеп, командаларға сәттілік тіледі. - Қанша күннен бері қаламызда күнде той. Кеше ғана театр ұжымы келіп, халықты бір қуантып кетсе, өткен сенбіде аламан ат бәйгесінің куәгері болдық. Бүгін міне, жастардың сүйікті ойыны - жайдарман. Мұның бәрі мерекеге орай, «Өзенмұнайгаз» АҚ-ның ұйымдастырып жатқан шаралары. Мерейтойларыңыз құтты болсын! Әрдайым халықты қуантып жүре беріңіздер, - деп қала әкімінің орынбасары компания ұжымына ізгі тілектерін білдірді. Жайдарманға жаңаөзендік жастар өте көп жиналды. Залда ине шаншар бос орын болмай, екі сағатқа созылған әзіл кешін көпшілік жастар тікесінен тік тұрып тамашалады. Ойын барысында қала әкімдігіне жастар тарапынан қалаға үлкен, замануи мәдениет үйінің қажеттілігі туралы ұсыныс айтылды. Ойынға Жаңаөзен қаласы әкімінің орынбасары Аманғали Нұрдәулетов, қала әкімінің жастар ісі жөніндегі кеңесшісі Асқар Ноғай, «Өзенмұнайсервис» ЖШС директорының орынбасары Бауыржан Базарбаев, «Қазақстан КВН одағының» Маңғыстау облыстық филиалының басшысы Дәулет Сағынтаев және «Өзенмұнайгаз» АҚ әлеуметтік-әкімшілік департаментінің директоры Тарас Алеуединов қазылық етті. Жоғары лигада өнер көрсетіп, тісқаққан мақтаулы командалардың дайындығы осал көрінді. 2018 жылы Жаңаөзен қаласы әкімінің кубогын иеленген ақтөбелік «Фемида» командасы бұл жолы чемпиондық биігінен көріне алмады. «Грант» пен «Боранқұлдың» да әзілдері солғын шықты. Жаңаөзендік жастардың көңілінен шыққан - жергілікті «Жалын» командасы болды. Жігіттердің ұтқыр әзілдері мен әртістік шеберлігі – қаламызда тағы бір сапалы команданың шыңдалып келе жатқанын аңғартты. «Өзенмұнайгаз» құрамасының астарлы әзілмен қозғаған әлеуметтік мәселелері, мұнайшылар өмірі, қазақтың тойы жайында ойнаған әзілдері көрермен тарапынан жылы қабылданды. «Кубокты бізге берсеңіздер, еліміздегі ең үздік білім ордасы – Еуразия ұлттық университетінің төріне қойып, еліміздің түкпір-түкпірінен жиналған студенттерге «Өзенмұнайгаз» компаниясын танытып, тегін пиар жасап береміз» - деп әзілдеген елордалық «Евразиат» командасы І орынды жеңіп алып, Кубок иегерлері атанды. «Жалын» - ІІ орынды иеленсе, «Өзенмұнайгаз» бен «Фемида» ІІІ орынды өзара бөлісті. «Көрермендер көзайымы» номинациясын «Боранқұл» командасы алып, «Грант» - ойынға белсене қатысқаны үшін марапатталды. Барлық жеңімпаздарға ақшалай сыйлықтар берілді. Сондай-ақ, «Жаңаөзен қаласында Жайдарман ойындарының дамуына қосқан үлесі үшін» алғыс хатымен Қазақ КВН Одағы атынан «Өзенмұнайгаз» АҚ әлеуметтік-әкімшілік департаментінің директоры Тарас Алеуединов және өзге де бірқатар жаңаөзендік белсенді азаматтар марапатталды.

Айжан НАСЫРОВА