Бұл туралы қоғамдық коммуникациялар орталығында өткен брифингте облыстық экология департаментінің басшысы Руслан Төкенов мәлімдеді, - деп хабарлайды mangystaumedia.kz сайты.
Сондай-ақ, Маңғыстау ауданындағы Шетпе ауылына жақын орналасқан карьерлерге салынған әкімшілік айыппұлдың жалпы сомасы 1 338 250 теңгені құраған.
Айта кетейік, экология департаменті 2019 жылы Шетпе ауылына жақын орналасқан карьерлердің санитарлық-қорғау аймағының шегінде зертханалық-зерттеу жұмыстарын жүргізді. Департамент экологиялық заңнамаларды сақтау мәселесі бойынша 7 кәсіпорынға жоспардан тыс тексерулер жүргізіп, нәтижесінде мемлекеттік экологиялық сараптама және экологиялық рұқсатсыз қызметті жүзеге асыру, сондай-ақ шаң-тозаңды басу және т. б. қондырғыларды енгізу жөніндегі жобалық шешімдердің орындалмауын анықтаған.
Шетпе ауылына жақын орналасқан карьерлерден шығатын шаң мәселесі 10-15 жыл бойы көтеріліп келе жатқан еді. Мәселе тиісті түрде шешімін таппай, соңғы жылдары карьерлердің көбеюі ауыл тұрғындарының наразылығын өршіткен еді.
Бұған дейін хабарланғанымыздай, Маңғыстау облысының әкімдігі аталған мәселелерді шешу бойынша нақты мерзімдері көрсетілген іс-шаралар жоспарын әзірледі. Облыс әкімінің орынбасары Бақытжан Қашақовтың қатысуымен тас уатқыш қондырғыларын Шетпе ауылынан 10 км қашықтықта орналастыру, республикалық трассаға шығатын кәсіптік автомобиль жолдарының жабылуы туралы шешім қабылданды.
Бүгінгі күні республикалық трассаға кәсіптік автожолдардың шығуы жабық.
Құзыретті органның 2019 жылғы 30 желтоқсандағы шешімімен экологиялық бұзушылықтарды жойғанға дейін "Бай-бег" ЖШС, "Теміртас-1" ЖШС, "Аян Ақтау" ЖШС және "МКДСМ" АҚ келісімшарттардың қолданылуы тоқтатылды, ал "ШетпеТас" ЖШС және "Ш. К. Сейдалиев"ЖК жер қойнауын пайдалануға келісім-шарттың қолданылуы бір жақты тәртіпте тоқтатылды.
Сонымен қатар, көп ұзамай құзыретті орган "ДИС" ЖШС, "Бай-Бег" ЖШС және "Нұра"ЖШС-нің жер қойнауын пайдалануға келісім-шарттарды бұзу (немесе тоқтата тұру) туралы мәселені қарайтын болады.
Айта кетейік, Маңғыстау облысы әкімдігінің жер қойнауын пайдалану жөніндегі операцияларды жүргізуге келісім-шарт беретін 28 кәсіпорын құрылыс тастарын өндіру жөніндегі қызметін жүзеге асырады.
Махаббат НҰРЖАНҚЫЗЫ
Суретті түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
