Сайөтестегі ошақ бәйге: миллион Алмастың «Ханшайымына» бұйырды

Сайөтесте Сисем Атаға және қауымда жатқан ата-бабалар рухына арналған «Сисем – елдің есігі, ердің бесігі» атты жалпыхалықтық ас берілді. Маңғыстау жұртшылығының басын қосқан сауапты іс екі күнге жалғасты. 130 киіз үй тігілді, асқа 5000-нан аса адам келді. Сондай-ақ қазақша күрес, ошақ бәйге, аламан бәйге ұйымдастырылды. Күн қызара батқанда жыршылар жыр жырласа, ақындар кешегі мен келешекті қара өлеңге сыйдырып, өз туындысын көпшілікке ұсынды. Астың бірінші күні, яғни 13 қыркүйекте ошақ бәйге өтті. Оған Маңғыстаудың түкпір-түкпірінен келген 30-ға жуық шабандоз қатысты. Бәйгеге қатысушылар 21 шақырым, 6 айналымды бағындырды. Нәтижесінде Ақтау қаласынан келген Алмас Абдулдановтың «Ханшайымы» 1-орын алды. Жеңімпазға 1 миллион теңге берілді. Шебір ауылынан Айтұмыс Ержігітов «Айжирен» атымен  2-орынға жайғасты, ал «Көкбастаудың» иесі Хамза Бимырзаев Таушық ауылының намысын қорғап, жүлделі 3-орынды иеленді. Сонымен қатар Қияқтыдан Құлназар Алиевтың «Пегасы» 4-орынды алса, 5-орын жаңаөзендік Рахим Махамбетовтың «Ханшайымына» бұйырды. Жеңімпаздарға ақшалай сыйлықтар мен арнайы диплом табысталды.

Жұлдызай ҚАЛИЕВА

Суреттерді түсірген Талант ҚҰСАЙЫН

[gallery td_select_gallery_slide="slide" ids="85145,85144,85147,85146,85148,85149"]