«Өз ісінің шебері» тігін шеберханасы
[ 2019 ] 27 қыркүйек, 11:50 | Қоғам
Биыл Маңғыстау облысында «Жас прожект» әлеуметтік бағдарламасы жүзеге асқан болатын. Жоба шарты бойынша жастарға 1 миллион теңге көлемінде қайтарымсыз грант беріліп, ол қаржыға жоба қатысушылары халыққа әртүрлі бағытта тегін әлеуметтік көмек көрсетуге тиіс болатын. Жаңаөзен және оған іргелес Қызылсай, Теңге, Рахат ауылдарынан шыққан жоба жеңімпаздары маусым айында өз жұмыстарын бастады.
Бағдарлама шеңберінде жұмысын сәтті жасап келе жатқан қызылсайлық жоба - «Өз ісінің шебері» атты тігін шеберханасы. Жоба жеңімпаздары Ержан, Қарлығаш, Әлия Назархандар бір үйдің балалары. Олар ауылда ашылған шағын шеберханада тігін өнерін жастарға үйретіп қана қоймай, мұқтаж жандарға тегін қызмет көрсетеді. Яғни, ауыл әкімдігінің бекітіп берген тізімі бойынша әлеуметтік жағынан аз қорғалған отбасы мүшелеріне киім тігіп берумен айналысады.
- Анамыз тігінші. Жастайымыздан біздерді осы өнерге баулыды. Үлкен тігін шеберханасын ашуды армандаушы едік. «Жас прожект» жобасы жайында естіп, оның шарттарымен танысқанда неге осындай мүмкіндікті қолданбасқа деген ой келді. Бағдарлама шарты бойынша 1 млн. теңге бізге екі бөлініп берілді. Алғашқы бөлігіне 3 кішкентай тігін машинасын, кейін 2 үлкен кәсіби тігін машиналарын сатып алдық. Оқу жылының алдында балаларға оқу формасын тіктік. Ал басқа уақыттарда көбінесе, ауылдың қыз-келіншектері әртүрлі көйлектерге тапсырыс береді. Қажет шикізатты Ақтаудан, Жаңаөзеннен аламыз, - деген «Жас прожект» жобасының жеңімпазы Әлия Назархан жоба аяқталғасын шеберхана жұмысының бағытын кәсіпкерлікке қарай бұрамыз деп отыр.
Айжан НАСЫРОВА
2268
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
