Маңғыстаулық балуандар қазақ күресінен 5 жүлде иеленді

Ақтауда жасөспірімдер арасында өткен ел біріншілігінде маңғыстаулық балуандар алтын, күміс және 3 қола жүлдені қанжығаға байлады, - деп хабарлайды mangystaumedia.kz сайты.

38 келі салмақта күрескен Диас Абыл барлық қарсыласының тізесін бүктіріп, чемпион атанды. Ал Шалқар Нұрманбет 50 келі салмақта бақ сынап чемпионаттың күміс жүлдесін иеленді. Ерасыл Машырық 60 келі, Жасұлан Сайын 65 келі, Олжас Боқай 50 келі салмақ дәрежесінде қоладан медаль тақты.

Біріншілік жеңімпазы атанған маңғыстаулық жасөспірімдер ұлттық құрама сапында белдесетін болады.

Ақтауда өткен дүбірлі додаға тұңғыш «Қазақстан Барысы», Халықаралық қазақ күресі федерациясының бас хатшысы Ұлан Рысқұл оң бағасын берді.

«Сен тұр, мен атайын» дейтін өскелең ұрпақ соңымыздан еріп келе жатқанын чемпионат нәтижесінен байқауға болады. Осы балуандардың ішінен болашақта әлем чемпионы шықсын деген тілек білдіремін. Маңғыстауда төл күресіміздің дамығандығы көңіл қуантады. Чемпионат жүлдегерлері алдағы уақытта үлкен додаларда топ жаратынына сенемін», - дейді Ұлан Рысқұл.

Махаббат НҰРЖАНҚЫЗЫ

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.