Ақтауда жаңа шағынаудандарға қазандық сатып алынады

Алдағы жылу маусымына 474 білім беру, 105 денсаулық сақтау, 156 әлеуметтік нысанды, 390 қазандықты, 779 шақырым жылу желісі мен 1 712 тұрғын үй нысанын қосу жоспарланып отыр. Бұл туралы Маңғыстау облысы әкімінің орынбасары Бекбол Орынбасаров айтты, - деп хабарлайды mangystaumedia.kz.

Наурызда жылу желілері мен жылу жүйелеріне жүргізілген температуралық сынақтар барысында 45 ақау анықталып, қазір жойылды. Ақтауда 23-27 мамыр аралығында жылу желілерін гидравликалық сынақтан өткізу басталады. МАЭК-те алдағы жылыту маусымына дейін ЖЭО-2-де 3 қазандықты, ЖЭО-1 мен ЖЭО-2-де 2 турбоагрегатты, 1 энергоблокты, 6 су тұщыту қондырғысын және 6 қазандықты жөндеу жоспарлануда.

«Ақтау қаласының 20, 28 А және 33 шағынаудандарының тұрғындарын үздіксіз жылумен қамтамасыз ету мақсатында жылу қазандықтарының 5 модулі сатып алынады. Бюджеттен 301,6 млн теңге бөлініп, қазіргі таңда мемлекеттік сатып алу жүргізілуде. Ақтау қаласының 18 және 32 шағынаудандарында қуаттылығы 40 Гкал/сағ болатын 2 модульдік қазандық сатып алу қажет. Бұл қазандықтарды газбен қамтамасыз ету үшін биыл магистральдық газ құбырының құрылысын аяқтау қажет. Оны аяқтау үшін бюджеттен қосымша 4,9 млрд теңге қажет», – деді облыстық энергетика және тұрғын үй-коммуналдық шаруашылық басқармасының басшысы Бердібек Қартбаев.

Қазіргі таңда облыс орталығындағы 1-6 шағынаудандардың жылу желілерін жаңғырту жобасы әзірленді. Жоба ведомстводан тыс сараптама сатысында тұр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.