Қаламқаста №8237 апаттық ұңғымасындағы грифон тоқтатылды

©

Атқарылған шаралар нәтижесінде 26 мамыр күні сағат 20:40 шамасында №8237 апаттық ұңғымасынан су-газ қоспасының (грифон) атқылауы тоқтатылды. Бұл туралы «Маңғыстаумұнайгаз» АҚ жұртшылықпен байланыс бөліміне сілтеме жасап mangystaumedia.kz сайты хабарлайды. 22 мамыр күні сағат 18.20 шамасында Қаламқас кенорнында орналасқан №8237 ұңғымасы жанынан су-газ қоспасының атқылауы (грифон) пайда болған еді. "Маңғыстаумұнайгаз" компаниясының мәлімдеуінше, грифондардың қайта пайда болуы күтілген жағдай болғандықтан мамандар дайын болған. Ұңғыманы басқару тетіктері сақталып, сағасы өртке қарсы құрылғылармен жабдықталып, тұншықтыру және дроссельдеу блогымен қамтылған.  Грифон 1 шаршы метр алаңда биіктігі 30-40 см-ден 10 шаршы метр алаңда биіктігі бір метрге дейінгі аумақты алған. "Жедел штаб құрылып, оқшаулау жұмыстары жүргізілді, қауіпті аймақ қоршауға алынып, авария салдарын жоюға тікелей қатысы жоқ адамдарды өткізуге тыйым салынды; грифон бетіне мергель топыраған төгу жұмыстары жүргізілді; грифоннан су мен газдың сынамасы алынды; осыған орай су мен газдың құрамы бойынша ықтимал көздер (газды және сулы қабаттар) анықталды; газ бен судың шығуына себепкер болуы мүмкін су айдау және газ өндіру ұңғымалары анықталып, тоқтатылды", - делінген хабарламада. Соның нәтижесінде грифон 26 мамыр күні сағат 20:40 шамасында тоқтатылған. Айта кетелік, биыл наурыз айында кенорында грифондардың бірі өртеніп, от ошағы сөндірілген еді. Осыдан кейін «НИИ ТДБ «Қазмұнайгаз», «ММГ» АҚ және тәуелсіз сарапшылардын қатысуымен жұмыс тобы құрылған. Жұмыс тобы №8237 апаттық ұңғымасының айналасынан ауданы 4 шаршы шақырым болатын зерттеу аймағын белгілеп, 98 ұңғыманы тексеруге алған. Компанияның мәлімдеуінше, олардың арасында жұмыс жасап тұрғандары, жұмыс жасамай тұрғандары және ликвидациялық ұңғымалар бар. "Қазіргі таңда бұрғылау жұмыстарын жүргізу және кенорынды игеру кезінде мұндай жағдайлардың орын алмауы үшін тиісті шаралар атқарылуда. Бұл шараның орындалуы барысында су-газ қоспасының атқылау жағдайы қайталануы мүмкін. Бірақ, ол басқарылатын процесс", - делінген хабарламада.