"Бейнеу - Тәжен" тас жолы қыркүйекке дейін пайдалануға беріледі

Маңғыстау облысының әкімі Ералы Тоғжанов жексенбі күні Бейнеу ауданына қарасты Өзбекстан елімен шекаралас орналасқан Тәжен және Ақжігіт ауылында болды. Әкім жұмыс сапары барысында Бейнеу ауданынан Тәженге дейін салынып жатқан автомобиль жолының құрылысымен танысты, - деп хабарлайды mangystaumedia.kz сайты МО әкімдігінің баспасөз қызметіне сілтеме жасап. Мердігер компания басшыларының айтуынша, жол қыркүйек айына дейін толық аяқталып, тапсырылады. Егер жол пайдалануға берілсе, ауыл халқына да мол мүмкіндік тіршіліктің жаңа бағыты пайда болмақ. [gallery td_select_gallery_slide="slide" ids="80122,80126,80124"] Аймақ басшысы Тәжен ауылының тұрғындарымен жүздесіп, ауыл әкімінің есебін тыңдады. 217 адам тұратын бұл ауыл ауданнан 85 шақырым қашықтықта орналасқан. Облыс басшысы іссапармен келген Ақжігіт ауылындағы негізігі кәсіп - мал шаруашылығы. Мұнда 21 шаруа қожалығы тіркелген. 446 бас сиыр, 20 986 бас қой мен ешкі, 1 387 бас жылқы және 4 340 бас түйе бар. "Ауылдың 5 азаматы жеңілдетілген пайызбен ауыл шаруашылығын қолдау бағыты бойынша «Атамекен» микро-қаржы ұйымы арқылы 21 млн теңге несие алса, бір азамат «Сыбаға» бағдарламасы арқылы қой өсіру үшін 6 млн теңге алды. «Бизнес 3 күнде» жобасы арқылы қолдау көріп, өз жұмысын бастаған 3 отбасы бар. Екеуі тігінмен айналысып, тігін цехын ашуда, біреуі ағаш бұйымдарын жасаумен айналысып отыр", - деді ауыл әкімі Серік Қамысбаев. Кездесу кезінде ауыл тұрғындары облыс әкіміне елді-мекеннің дамуына қатысты ұсыныстарын айтып, ойларын ортаға салды. Айта кетелік, тұрғындармен кездесіп, ауылдың тыныс-тіршілігімен танысуды мақсат еткен облыс басшысы Маңғыстаудағы 61 елді-мекенді түгел аралап шықты.

Суреттерді түсірген Серік МАЙЕМЕРОВ