Төтеншеліктер тұрғындарға судағы қауіпсіздік шараларын түсіндірді

Маңғыстау облыстық төтенше жағдайлар департаменті мен Ақтау қаласының полицейлері 25 мамыр күні теңіз жағалауында бірлескен рейд өткізді. Айта кетелік, биыл суға түсу маусымы 1 маусымда ашылады, - деп хабарлайды mangystaumedia.kz сайты. Төтеншеліктер судағы қауіпсіздік шаралары мен зардап шеккен адамға көмектесу және көмек шақыру жолдарын түсіндірді. Мамандардың айтуынша, жазғы кезеңде суда болған жазатайым оқиғалар мен өлімнің негізгі себептері ересектердің балаларды қараусыз қалдырғанынан болады. Ал полиция қызметкерлері азаматтарға қоғамдық орындарда алкогольдік ішімдік ішпеу жөнінде түсіндіру жұмысын өткізді. «Мұндай рейдтер жаз бойы жүреді. Бұған дейін 1 сынып оқушыларының арасында «Судағы қауіпсіздік» атты флеш-моб өтті. Теңіз жағасындағы рейд кезінде 700-ден аса адамға жадынама таратылды. Шараға департаменттің 20 қызметкері мен 2 техникасы, 10 полиция қызметкері мен 4 полиция техникасы қатысты», - деді Маңғыстау облысы ТЖД азаматтық қорғаныс бөлімі бастығы Б.Абдикадыров.